SQO-da koronavırýspen aýyrǵandar sany artyp keledi
PETROPAVL. QazAqparat – Soltústik Qazaqstan oblysynda KVI-di juqtyrǵandar sany artyp keledi, ótken táýlikte 59 adamnan qaýipti ınfektsııa anyqtaldy, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti brıfıngte óńirdegi koronavırýs boıynsha jaǵdaıǵa toqtaldy. Departament basshysynyń orynbasary Arman Kúshbasovtyń aıtýynsha, oblysta jaǵdaı máz emes, «qyzyl aımaqqa» kirýge shaq qaldyq. Máselen ótken táýlikte 59 adamda KVI anyqtalǵan. Olardyń 52-si dárigerge aýyryp qaralǵan.
«Qyzyl aımaqqa» kiretin bolsaq, shekteý sharalary kúsheıtiledi. Oǵan jol bermes úshin barlyǵymyz sanıtarııalyq-epıdemıologııalyq talaptardy saqtaýymyz qajet. Halyq kóp shoǵyrlanǵan jerlerge barýdan bas tartyp, áleýmettik ara qashyqtyqty saqtaǵan jón. Árıne, maska taǵýdy da umytpaımyz», - deıdi Arman Kúshbasov.
SQO-da koronavırýs juqtyrǵandardyń sany 9 350-ge jetti. Olardyń 60% -y medıtsınalyq mamandarǵa kómek surap júginse, 23%-i juqtyrǵandarmen baılanysta bolǵan. Al qalǵany profılaktıkalyq tekseris barysynda ózderiniń COVID-19 juqtyrǵandaryn bilgen.
«KVI barlyq jastaǵy adamdardan anyqtalyp jatyr. Degenmen aýyrǵandardyń basym bóligi - 47%-i – jasy 50-den asqandar. Shekara asyp kelgenderdiń de úlesi joǵary. Óńirde tirkelgen juqtyrǵandardyń 4% - 364 adam shetten aýyryp kelgen», - deıdi departament basshysynyń orynbasary.
Jalpy 202 jyldyń 6 qazany men 2021 jyldyń 12 qańtary aralyǵynda Reseımen shekarada ornalasqan beketter arqyly 50,6 myń adam ótken. Olardyń tek 16,2 myńynda ǵana PTR test qorytyndysy bolǵan. Anyqtamasy joq 2,5 myń adam tekserilip, olardyń 222-sinen KVI anyqtaldy», - deıdi Arman Kúshbasov.
