SQO-da koronavırýsqa qarsy vaktsınany tolyq alǵandar sany 117 myńnan asty
PETROPAVL. QazAqparat – Soltústik Qazaqstan oblysynda koronavırýsqa qarsy vaktsınany tolyq alǵandar sany 117 myńnan asty, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń málimetinshe, oblysta KVI-ge qarsy ekpeniń birinshi komponentin 186 799 adam alǵan. Bul – egilýi tıis halyqtyń 60 %. Tolyq kýrstan ótkender sany – 117 087 adam.
«Jalpy sońǵy aptada SQO-da 684 adam koronavırýsty juqtyrdy.
Olarmen baılanysta bolǵan 1 138 adam anyqtaldy. 288-i vaktsınatsııadan ótkender. Bular úı karantınine jatqyzylmaıdy. Taǵy bir ereksheligi – PTR-synama tapsyrmaıdy. Medıtsınalyq qyzmetkerler olardy baqylaýǵa aldy. Aralarynda aýyrǵandar joq. Vaktsınatsııanyń oń áseri de osy», - deıdi SQO sanıtarııalyq-epıdemıologııalyq baqylaý departamentiniń basshysy Áset Jumataev.
Buǵan deıin óńirde koronavrýs juqtyrǵandar sanynyń artqanyn aıtqan edik.
«Barlyǵymyz túrli shekteýlerden sharshadyq. Jaǵdaı ýshyqpaýy úshin, qaıtadan «jasyl» aımaqqa ótý úshin turǵyndardy azamattyq ustanym kórsetip, vaktsına alýǵa, qoǵamdyq oryndarda maska kıip, áleýmettik ara qashyqtyqty saqtaýǵa shaqyramyn. Toı-tomalaqtan bas tartaıyq. Tek sol ýaqytta ǵana biz qaýipti ınfektsııanyń taralýyn toqtata alamyz», - dedi Áset Jumataev.
SQO densaýlyq saqtaý basqarmasynyń málimetinshe, qazir ınfektsııalyq statsıonarlarda 517 syrqat em alyp jatyr. Olardyń 31-iniń jaǵdaıy nashar. Aýrýhanadaǵy oryndar 43 %-ǵa tolǵan.
Koronavırýstyń taralýyna toqtaý salý úshin óńirde 26 shildeden bastap shekteý sharalary kúsheıtiledi.
