SQO-da koronavırýsqa qarsy vaktsına aldymen medqyzmetkerlerge, muǵalimderge, stýdentterge egiledi
PETROPAVL. QazAqparat – Soltústik Qazaqstan oblysyna koronavırýsqa qarsy vaktsınanyń 80 myń danasy alynbaq, dep habarlaıdy QazAqparat tilshisi.
SQO-da ótken brıfıngte densaýlyq saqtaý basqarmasy basshysynyń orynbasary Nurlan Aımanov koronavırýsqa qarsy vaktsınaǵa qatysty kóptiń kókeıinde júrgen suraqtarǵa jaýap berdi.
Mamannyń aıtýynsha, jospar boıynsha oblysqa bul vaktsınanyń 80 myń dozasy alynbaqshy. Birinshi kezekte ekpe medıtsına qyzmetkerlerine jasalady. Sondaı-aq, muǵalimder, stýdentter jáne sozylmaly aýrýymen tirkeýde turǵan syrqattar egiledi. Monıtorıngtik top músheleri de alǵashqylardyń biri bolyp ekpe alady.
«Vaktsınanyń oblysqa qaı ýaqytta keletini ázirge belgisiz. Jalpy koronavırýsqa qatysty jaǵdaıdy qadaǵalap otyrmyz. Óńirde vırýs juqtyrǵandarǵa arnalǵan 1165 oryn bar. Qazir olardyń jartysyna jýyǵynda KVI-men aýyrǵandar jáne ókpesi qabynǵandar em alyp jatyr. Táýligine statsıonarlarǵa 40-qa jýyq adam túsedi. Demalys kúnderi syrqattar sany kóp boldy, 54 adamdy jatqyzdyq», - deıdi Nurlan Aımanov.
Mamannyń aıtýynsha, qazir 21 naýas aýyr halde jatyr. Segiz adam jasandy tynys alý apparatyna qosylǵan. Al 1051 adam úılerinde em alýda.
«Jedel járdem» qyzmetine táýligine 400-ge jýyq shaqyrtý túsedi. Onyń 70 shaqtysy KVI-ge baılanysty. Budan basqa 98 mobıldi top jumys istep jatyr. Olar orta eseppen kúnine 550-ge jýyq adamǵa qyzmet kórsetedi», - deıdi medıtsınalyq qyzmetker.
