SQO-da koronavırýsqa qarsy sharalardyń keshendi jospary ázirlendi
PETROPAVL. QazAqparat – Soltústik Qazaqstan oblysynda koronavırýstyń óńirde taralýyna jol bermeý maqsatynda epıdemııaǵa qarsy aldyn alý is-sharalarynyń keshendi jospary ázirlendi, dep habarlaıdy QazAqparat tilshisi.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, óńirde koronavırýsty juqtyrǵandar tirkelmegen. Infektsııanyń óńirde taralmaýy úshin keshendi is-sharalar jospary bekitildi. Arnaıy shtab qurylyp, oblys ákimi Qumar Aqsaqalov onyń múshelerin bekitti. Medıtsınalyq qyzmetkerler úshin oqytý semınary ótti.
Óńirdegi emdeý mekemeleri qaýipti dertti juqtyrǵandardy nemese olarmen baılanysta bolǵandardy qabyldaýǵa ázir. Barlyǵy 293 jatyn oryn ázirlense, sonyń 115-i oblystyq balalar aýrýhanasynda, 65-i birinshi qalalyq aýrýhanada. Qalǵan 115 oryn aýdandyq juqpaly aýrýlar bólimshelerinde daıyndaldy.
Mamandardyń aıtýynsha, qazir óńirdegi barlyq emdeý mekemelerinde vırýsqa qarsy, qyzýdy túsiretin, ýytsyzdandyrǵash eritindiler men preparattardyń jetkilikti qory bar
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti óńir turǵyndaryn Qytaı Halyq Respýblıkasy men Ońtústik-Shyǵys Azııa elderine ázirshe saparǵa shyqpaýdy suraıdy. Sondaı-aq túrli juqpaly vırýspen kúresý úshin qoldy sabynmen jıi jýýǵa, túshkirgen jaǵdaıda aýyz ben muryndy bir rettik sýlyqpen jaýyp, ony qoqys konteınerine tastaýǵa, halyq kóp shoǵyrlanǵan jerlerge barmaýǵa, dene qyzýy kóterilip, jótel qysqan jaǵdaıda birden dárigerdi shaqyrýǵa keńes beredi.
Bul kúnderi túrli zoobaqtarǵa barýdy shektep, janýarlar jáne balyq ónimderin shıkileı qoldanbaýdy eskertedi.
