SQO-da koronavırýs juqtyrýdyń rekordtyq kórsetkishi tirkeldi
PETROPAVL. QazAqparat – Soltústik Qazaqstan oblysynda ótken táýlikte koronavırýs juqtyrǵandardyń rekordtyq sany tirkeldi, qaýipti ınfektsııa 170 adamda anyqtaldy, dep habarlaıdy QazAqparat tilshisi.
SQO Densaýlyq saqtaý basqarmasy baspasóz qyzmetiniń málimetinshe, óńirde pandemııa bastalǵaly koronavırýs barlyǵy 19 758 adamnan anyqtaldy. Onyń 170-i indetti ótken táýlikte juqtyrdy. Bul – óńirde tirkelip otyrǵan rekordtyq kórsetkish (10 tamyzda – 157, 11 tamyzda – 159 adam). Aýyrǵandardyń joǵary úlesi – Petropavlda, munda KVI juqtyrýdyń 75 jaǵdaıy tirkelgen. Aýdandar boıynsha, eń kóp naýqas oblys ortalyǵyna «tıip» turǵan Qyzyljar aýdanynda (17 adam) jáne kýrorttyq aımaq – Aıyrtaý aýdanynda (15 adam) anyqtaldy. Esil men Taıynsha aýdandarynda 11 jaǵdaıdan tirkelse, qalǵandarynda bul kórsetkish shamamen eki ese az.
Óńirde koronavırýs juqtyrǵandarǵa arnalǵan 1715 oryn bar, onyń qazir 47% toly. 775 adam em alyp jatyr, 58 syrqattyń jaǵdaıy asa aýyr, olar ókpeni jasandy jeldetý apparatyna qosylǵan.
Resmı aqparat boıynsha, indet bastalǵaly SQO-da 82 adam koronavırýstan qaıtys boldy, onyń ekeýi ótken táýlikte kóz jumdy.
