SQO-da koronavırýs juqtyrý 10% artty
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde epıdemıologııalyq jaǵdaı turaqsyz, sońǵy eki aptada koronavırýsty juqtyrýdyń 1167 jaǵdaıy tirkeldi, osylaısha syrqattanýshylyq 10% artyp otyr.
«Koronavırýspen aýyrǵandar sanynyń artýyna vaktsınatsııa qarqynynyń tómendeýi de áser etti. Jaǵdaıdy turaqtandyrý úshin, biz qyrkúıek aıynyń sońyna deıin 311 myń adamdy vaktsınalaýdyń tolyq kýrsynan ótkizýimiz kerek edi. Jospar oryndalmady. Tek 243 myń adam birinshi komponentpen, 223 myń turǵyn eki komponentpen egildi. Bul – jospardyń 72,1%. Oblysta kúnine 200-300 adam ǵana egiledi, bul – óte az. 311 myń adamdy vaktsınatsııamen qamtıtyn bolsaq, ujymdyq qorǵanys deńgeıi jalpy halyqtyń 57,2% quraıdy. DDU usynǵan ujymdyq ımmýnıtettiń eń tómengi deńgeıi – 60 %. 206 eldiń 65-ten astam eli 50% nemese odan da kóp qamtý deńgeıine jetti», - deıdi SQO Sanıtarııalyq-epıdemıologııalyq baqylaý departamentiniń basshysy Áset Jumataev.
Mamannyń aıtýynsha, jańa shtamdardyń paıda bolýyna baılanysty endi halyqtyń kem degende 80% vaktsına alýy tıis.
«Balalardy, sondaı-aq vaktsınatsııaǵa qarsy kórsetilimderi bar adamdardy qorǵaý maqsatynda, Úkimet KVI-diń aldyn alý úshin vaktsınanyń qosymsha kólemin satyp alady. Endi vaktsınatsııamen josparlanǵan qamtý deńgeıi oblystyń eresek turǵyndarynyń 90% nemese 374 myń adamǵa jetýi kerek», - deıdi Áset Jumataev.
Oblystyń bas sanıtar dárigeriniń aıtýynsha, koronavırýs juqtyrýshylar sanynyń ósýi sýyqtyń kelýimen, sondaı-aq vırýstyq ınfektsııalar maýsymynyń bastalýymen de baılanysty. Turǵyndardyń maska kııý jáne áleýmettik qashyqtyqty saqtaý sııaqty qaýipsizdik sharalaryn elemeýi de óz áserin bergen.
Buǵan deıin SQO-da koronavırýs juqtyrǵandar arasynda ólim-jitimniń kóbeıgenin aıtqan edik. Tek bir aptada óńirde qaýipti ınfektsııadan 21 adam qaıtys bolǵan.
Al SQO Aıyrtaý aýdandyq soty vaktsınatsııa pasportyn qoldan jasaǵan feldsherdi sottady.
