SQO-da koronavırýs juqtyrǵandardyń alpys paıyzǵa jýyǵy 40 jasqa deıingi jastar
PETROPAVL. QazAqparat – Soltústik Qazaqstan oblysynda bir aptada koronavırýsty juqtyrǵandar sany eki ese ósti, aýyrǵandar negizinen 40 jasqa deıingi jastar, dep habarlaıdy QazAqparat tilshisi.
SQO óńirlik kommýnıkatsııalyq qyzmetinde aımaqtaǵy koronavırýs ınfektsııasy boıynsha aǵymdaǵy jaǵdaı jáne vaktsınatsııalaý barysy boıynsha brıfıng ótti.
Oblystyń bas memlekettik sanıtar dárigeri Áset Jumataevtyń aıtýynsha, koronavırýsty juqtyrǵandar sany artyp keledi. Máselen ótken táýlikte óńirde 55 jańa jaǵdaı tirkelgen.
«Sońǵy aptada syrqattaný 141 jaǵdaıdan 279 jaǵdaıǵa deıin, ıaǵnı 2 esege artty jáne odan ári ósý úrdisi bar. Ereksheligi – koronavırýsty juqtyrǵandardyń 84%-y dárigerlerge aýyryp kóringen, aýrý sımptomdarymen túsetinder kóbeıgen. Sondaı-aq aýyrǵandardyń jasy ózgerdi, qazirgi ýaqytta aýyrǵandardyń 57%-y - 40 jastan kishi, buryn bul kórsetkish 40 %-dan aspaıtyn», - deıdi Áset Jumataev.
SQO-nyń bas memlekettik sanıtar dárigeriniń aıtýynsha, aýrýdyń ósýine respýblıka aýmaǵynda «delta» shtamynyń paıda bolýy, sondaı-aq halyqtyń karantındik sharalardy saqtaýda tártipti bosańsytqany áser etken.
«Sońǵy 7 kúnde KVI juqtyrýdyń 279 jaǵdaıy tirkeldi. Aýyrǵandarmen baılanysta bolǵan 621 adam anyqtaldy, onyń 125-i vaktsınatsııadan ótken, bul adamdar úı karantınine jiberilmeıdi, PTR zerthanalyq zertteýleri júrgizilmeıdi, medıtsınalyq baqylaýǵa alyndy, olardyń eshqaısysy aýyrmaǵan. Bul vaktsınatsııanyń aıqyn artyqshylyǵy. Jalpy aýyrǵandar sany óńirde 15 675-ke jetti», - deıdi oblystyń bas memlekettik sanıtar dárigeri.
SQO-da búginge deıin birinshi komponentpen 165 525 adam egildi. Bul jospardyń 53,2%-y ǵana. Al ekinshi komponentpen 83 725 adam egildi, qamtý 26,9 %.
