SQO-da koronavırýs juqtyrǵandar sany artyp keledi
PETROPAVL. QazAqparat – Soltústik Qazaqstan oblysynda koronavırýs juqtyrǵandar sany artyp keledi. Tórt adamnan qaýipti úndi shtamy anyqtaldy, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, óńirde COVID-19 boıynsha epıdemıologııalyq jaǵdaı turaqty emes. Aýyrǵandar sany artyp keledi. Tek ótken táýlikte 27 adamda tirkelgen.
«27 adamnyń 19-y dárigerge aýyryp kóringen. Jalpy sońǵy aptada aýrý 109-dan 129 jaǵdaıǵa deıin, 18 %-ǵa ósti jáne odan ári arta túspek.
Syrqattanǵandardyń 83 %-ynda aýrýdyń belgileri bar. Sońǵy 7 kúnde RT reprodýktıvti sany 1-den asty», - deıdi Áset Jumataev.
Mamannyń aıtýynsha, aýrýdyń kóbeıýine úndi shtamynyń elimizde paıda bolýy jáne halyqtyń karantındik sharalardy saqtaý tártibiniń tómendeýi sebep.
KVI juqtyrǵandardan alynǵan oń zerthanalyq úlgilerdiń PTR skrınınginiń nátıjeleri boıynsha 4 adamda «delta» shtamy, ıaǵnı úndi shtamy anyqtalǵan.
«Koronavırýstyń belgileri búginde ózgergen. Inkýbatsııalyq kezeń 5 kúnge deıin qysqarǵan. Ýlanýdyń aıqyn belgileri bar. KVI-diń ókpeden tys túrleriniń jıileýi, keıbir jaǵdaılarda ishek sımptomdary basym bolady.
Aýrýdyń erte kezeńinde ókpeniń zaqymdaný aımaǵy ulǵaıyp, aýrý tez damıdy. Aýyr jáne óte aýyr formasymen aýyrǵan jas adamdardyń úles salmaǵy artyp, balalar men júkti áıelder qatty aýyratyn bolǵan. Sondaı-aq júrek-qan tamyr júıesiniń asqynýlary jıi kezdesedi», - deıdi SQO bas sanıtar dáriger.
Jalpy SQO-da koronavırýsty 15315 adam juqtyrdy.
