SQO-da koronavırýs juqtyrǵan eki naýqas tumaýratyp dárigerge ózi júgingen
PETROPAVL. QazAqparat – Soltústik Qazaqstan oblysynda COVID-19 vırýsyn juqtyrǵandardyń ekeýi buǵan deıin aýyrǵandarmen baılanysta bolmaǵan, dep habarlaıdy QazAqparat tilshisi.
Shuǵyl shtabtyń málimetinshe, SQO-da koronavırýs ınfektsııasyn juqtyrǵandardyń bireýi – 1988 jyly týǵan áıel, qalǵandary - 1986, 1989, 1993 jyly týǵan er adamdar. Onyń úsheýi – Petropavl qalasynyń turǵyny bolsa, tórtinshisi Taıynsha aýdanynda turady.
PTR dıagnostıkalyq zertteý nátıjesi boıynsha olarda COVID-19 dıagnozy rastaldy. Zerthanalyq taldaýlar epıdemıologııalyq kórsetkishter boıynsha eki turǵynnan iriktelip alyndy, ıaǵnı olar buǵan deıin naýqastarmen jaqyn baılanysta bolǵan.
Al ekeýi sýyq tııý belgilerimen medıtsınalyq mekemege júgingen. Barlyǵy Petropavl qalalyq aýrýhanasynyń juqpaly aýrýlar bólimine jatqyzyldy. Qazir tıisti em-dom alyp jatyr. Aýrý oshaqtarynda dezınfektsııalyq jumystar júrgizilýde.
Jalpy, 11 maýsymdaǵy jaǵdaı boıynsha SQO-da koronavırýs ınfektsııasyn juqtyrǵandardyń sany 76-ǵa jetti. Onyń ishinde emdelip shyqqandar sany — 48.
