SQO-da koronavırýs juqtyrǵan 26 adamnyń jaǵdaıy aýyr
PETROPAVL. QazAqparat – Soltústik Qazaqstan oblysyndaǵy ınfektsııalyq statsıonarlarda koronavırýs juqtyrǵan 500-ge jýyq adam em alyp jatyr. Olardyń 26-synyń jaǵdaıy aýyr bolsa, bireýiniń hali asa aýyr, dep habarlaıdy QazAqparat tilshisi.
SQO Densaýlyq saqtaý basqarmasy basshysynyń mindetin atqarýshy Nurlan Aımanovtyń aıtýynsha, óńirde koronavırýske baılanysty dúrligý joq, jaǵdaı qalypty. Infektsııalyq statsıonarlarda 1165 oryn daıyndalǵan, qazir onda 456 adam em alyp jatyr. Kúndelikti 30-70 adam tússe, sonsha adam táýir bolyp shyǵady.
«Em alyp jatqandardyń 26-synyń jaǵdaıy aýyr, taǵy bireýiniń hali asa aýyr, 8 adam ókpeni jasandy jeldetý apparattaryna qosylǵan. Olardyń barlyǵyna tıisti deńgeıde em júrgizilip jatyr. Qazir koronavırýspen kúreste medıtsınalyq qyzmetkerlerdiń tájirıbesi jetkilikti, olar oqý kýrstarynan ótti. Emdeý mekemelerine jetkilikti deńgeıde qondyrǵylar alyndy. «SK-Farmatsııa» tarapynan da másele joq, olar dári-dármekti der kezinde jetkizip otyr. Naýqastardyń 93,5% emdelip shyǵady. Bul, respýblıka boıynsha jaqsy kórsetkish», - deıdi Nurlan Aımanov.
Mamannyń aıtýynsha, koronavırýstyń jeńil túrimen aýyrǵandar ambýlatorlyq em alyp jatyr. Aýrý belgileri joq syrqattar da únemi mobıldi toptardyń baqylaýynda. Oblysta osyndaı 98 mobıldi top bolsa, sonyń 42-si Petropavlda jumys isteıdi.
«Buryn kópshilik ózdiginen emdelip, emdeý mekemelerine bara bermeıtin. Qazir turǵyndardyń 90% aýyrǵan jaǵdaıda birden dárigerge kórinedi, medıtsınalyq qyzmetkerler tarapynan da saqtyq sharalary kúsheıtilgen. Osyǵan baılanysty JRVI, pnevmonııamen aýyrǵandar kórsetkishi 11 aıda 18-20% artty. Aýyrǵan jaǵdaıda halyqtyń birden dárigerge kórinýi – durys, bul KVI-diń ári qaraı taralmaýyna, tizbekti tez arada úzýge múmkindik beredi», - deıdi SQO Densaýlyq saqtaý basqarmasy basshysynyń mindetin atqarýshy Nurlan Aımanov.
Dárigerdiń aıtýynsha, SQO-nyń emdeý mekemelerinde búginde ottegi kontsentratorlary da, ókpeni jasandy jeldetý apparattary da, pýlsoksımetrler de jetkilikti. Jańadan ottegi stansalary qosyldy. Zamanaýı jaraqtandyrylǵan jańa reanımobılder alyndy.
Jańa modýldi ınfektsııalyq aýrýhanaǵa altynshy kompıýterlik tomograf qoıyldy. Jaqynda taǵy alty rentgen-apparat jetkizilmek.
