SQO-da koronavırýs juqtyrǵan 24 bala statsıonarda em alýda

PETROPAVL. QazAqparat – Soltústik Qazaqstan oblysynda balalar arasynda pnevmonııamen aýyrǵandar sany kemigen, muny mamandar áleýmettik baılanystyń azaıǵandyǵymen túsindirdi, dep habarlaıdy QazAqparat tilshisi.

SQO-daǵy KVI boıynsha jaǵdaıǵa baılanysty ótken baspasóz máslıhatynda mamandar balalarǵa qatysty aqparatpen bólisti.

«Balalar arasynda pnevmonııamen aýyrǵandar bıyl az. Onyń basty sebebi – áleýmettik baılanys úzilgen. Jalpy koronavırýs juqtyrǵan 168 bala bizdiń esepke alyndy. Sonyń 24-i qazir statsıonarda em alyp jatyr. Onyń ekeýiniń jaǵdaıy ortasha bolsa, qalǵandaryniki – qanaǵattanarlyq. Qatty aýyryp jatqan balalar joq», - deıdi SQO Densaýlyq saqtaý basqarmasy basshysynyń mindetin atqarýshy Nurlan Aımanov.

Balalar jiti respıratorlyq vırýstyq ınfektsııamen negizinen kúz-qys aılarynda aýyrady. Eldegi pandemııaǵa baılanysty qazir aýrýdyń azǵana belgileri bolsa turǵyndar birden dárigerlerdiń kómegine júginetin bolǵan.

Oblystyń bas sanıtarııalyq dárigeriniń aıtýynsha, SQO-da KVI juqtyrǵan oqýshylardyń jalpy sany – 199. Onyń 159-y ekinshi toqsanda aýyrǵan.

«Ekinshi toqsanda aýyrǵan oqýshylardyń 75-i shtattyq rejımde oqysa, qalǵan 84-i qashyqtan bilim alǵan. Olar negizinen KVI-di úıde ata-analarynan, týystarynan juqtyrǵan. Osyǵan baılanysty 3 mekteptiń 28 synyby qashyqtan oqýǵa kóshirildi», - deıdi SQO Sanıtarııalyq-epıdemıologııalyq baqylaý departamenti basshysynyń mindetin atqarýshy Arman Kúshbasov.

Buǵan deıin SQO turǵyndarynyń ár ekinshisi qaýipti vırýsty negizinen úıde juqtyratynyn aıtqan edik.