SQO-da koronavırýs juqtyrǵan 23 adamnyń jaǵdaıy aýyr

PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrǵan 23 adam aýyr halde jatyr, dep habarlaıdy QazAqparat tilshisi.

SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, 8 jeltoqsanda óńirde koronavırýs juqtyrǵan 70 adam anyqtaldy. Olardyń jartysyna jýyǵynda aýrý belgileri bolmaǵan. Jańa jaǵdaılardyń úlesi burynǵysynsha Petropavlda kóp. Oblys ortalyǵynda - 27, Tımırıazev aýdanynda – 11, Aıyrtaý aýdanynda – 7, qalǵan aýdandarda 1-4 jaǵdaıdan anyqtaldy.

PTR ádisimen zerthanalyq taldaýlar epıdemıologııalyq kórsetkish boıynsha 60 adamnan, aldyn alý maqsatynda 2 jáne epıdqadaǵalaý maqsatynda 8 azamattan alyndy.

SQO Densaýlyq saqtaý basqarmasy baspasóz qyzmetiniń málimetinshe, ınfektsııalyq statsıonarlar 39%-ke, karantındik statsıonarlar 11 %-ke ǵana tolyq. Pandemııa bastalǵaly óńirde 40 adam qaıtys bolsa, búginde 23 syrqattyń jaǵdaıy aýyr.