SQO-da koronavırýs juqtyrǵan 22 medıtsına qyzmetkerine 2 mln teńgeden tólem jasaldy
PETROPAVL. QazAqparat – Soltústik Qazaqstan oblysynda COVID-19-ben kúresip júrip, indetti juqtyryp alǵan 22 medıtsına qyzmetkerine 2 mln teńgeden bir rettik áleýmettik tólem jasaldy, dep habarlaıdy QazAqparat tilshisi.
SQO Densaýlyq saqtaý basqarmasy baspasóz qyzmetiniń málimetinshe, koronavırýspen kúreste aldyńǵy shepte júrgen medıtsına qyzmetkerlerine qosymsha tólem aı saıyn jasalady. Olardyń jumys istegen saǵaty jáne qaı táýekel tobyna jatatyndyǵy eskeriledi.
SQO-da naýryz aıynda emdeý mekemeleriniń 493 qyzmetkeri joǵary eńbekaqy alsa, shilde aıynda olardyń sany 2597 adamǵa jetti.
«Óńirde ekinshi táýekel toby boıynsha eń kóp tólem jasaldy. 2063 qyzmetkerge 474,7 mln teńge tólendi. Úshinshi táýekel toby boıynsha 368,3 mln teńge 1742 qyzmetkerge berildi. Al qaýiptiligi joǵary – birinshi táýekel tobyna kiretin 759 maman 395,3 mln teńge aldy», - deıdi SQO Densaýlyq saqtaý basqarmasy baspasóz qyzmetiniń hatshysy Gúlnár Qalıeva.
Budan basqa medıtsınalyq áleýmettik saqtandyrý qorynan jumys ornynda koronavırýs pen vırýsty pnevmonııa juqtyrǵan medıtsına qyzmetkerlerine áleýmettik tólem jasala bastady. SQO-da 22 adam 2 mln teńgeden alsa, jaqynda taǵy 26 maman olardyń qataryna qosylmaq.
Aıta keteıik, tólem jasalatyn qyzmetkerlerdiń tizimin shuǵyl shtabtyń janynan qurylǵan aımaqtyq komıssııalar jasaqtaıdy. Bul komıssııanyń tóraǵasy bolyp ákimderdiń orynbasarlary bekitilgen. Quramyna medsaqtandyrý qorynyń qyzmetkeri, aımaqtyq bas sanıtarııalyq dáriger, densaýlyq saqtaý basqarmasynyń jáne úkimettik emes uıymdardyń ókilderi kirgen.
