SQO-da koronavırýs juqtyrǵan 17 jas ana emdelip jatyr
PETROPAVL. QazAqparat – Soltústik Qazaqstan oblysyndaǵy perınataldyq ortalyqta qaýipti indet juqtyrǵan 30-dan astam ana emdelip, sábılerimen úılerine qaıtsa, taǵy 17-si dárigerlerdiń qaraýynda, dep habarlaıdy QazAqparat tilshisi.
SQO-daǵy perınataldyq ortalyqta 10 shilde kúni 25 adamǵa shaqtalǵan karantındik jáne 20 oryndyq provızorlyq statsıonar ashyldy. Qazir munda dári-dármek jetkilikti, bilikti mamandar da bar. Búginde koronavırýs juqtyrǵan 17 jas ana em alyp jatyr.
Bolashaq ana perınataldyq ortalyqqa KOVID-19 vırýsyna tapsyrǵan testiń nátıjesimen kelýi tıis. Belgili bir sebepterge baılanysty test jasalynbasa, osyndaǵy dárigerlerdiń kómegine júginýge bolady.
«Dúnıejúzilik densaýlyq saqtaý uıymy anasynda vırýs anyqtalǵan jaǵdaıda ony balasynan aıyrmaýǵa ruqsat berdi. Tek, balaǵa ýaqytsha qospalar berýge keńes berip otyr. Bosanǵan kelinshek tolyǵymen jazylǵannan keıin, qaıta test tapsyrady, aýrý anyqtalmaǵan ýaqytta ǵana úıine jiberiledi. Qazir karantın bolǵandyqtan bosanýǵa seriktesterdi de kirgizbeımiz», - deıdi SQO perınataldyq ortalyqtyń bólimshe meńgerýshisi Natalıa Kleban.
Jalpy jyl basynan SQO-da 2515 sábı dúnıe esigin ashty. Ómirge bir úshem kelse, egiz týǵandardyń sany - 38.
«Qazir qansha ul jáne qyz bala dúnıege kelgendigi jóninde esep júrgizbeımiz. Dúnıejúzilik densaýlyq saqtaý uıymy olardy bólip eseptemeýge usynys jasap otyr. Tipti, júkti áıel ýltrodybystyq zertteýge kelgen ýaqytta da balanyń jynysyn aıtýǵa bolmaıdy. Bul genderlik saıasatqa baılanysty jasalǵan», - deıdi Natalıa Kleban.
