SQO-da koronavırýs statıstıkasyn jasyrý faktileri boldy ma - Bas sanıtar jaýaby
PETROPAVL. QazAqparat – Soltústik Qazaqstan oblysynda koronavırýstyń jańa jaǵdaılaryn jasyrý boıynsha Prezıdent Qasym-Jomart Toqaevtyń syn-eskertpesine qatysty mamandar brıfıngte túsinik berdi, dep habarlaıdy QazAqparat tilshisi.
Koronavırýs indetiniń taralýyna qarsy is-qımyl jónindegi keńeste Qazaqstan Prezıdenti Qasym-Jomart Toqaev birqatar óńirde koronavırýstyń jańa jaǵdaılarynyń jasyryn kúıinde qalǵanyn aıtty.
Onyń ishinde SQO da bar. Búgin osyǵan oraı Petropavl qalalyq sanıtarııalyq-epıdemıologııalyq baqylaý basqarmasynyń bastyǵy Áset Jumataev óńirlik kommýnıkatsııalar qyzmetiniń brıfınginde túsinik berdi.
«SQO-da koronvırýs juqtyrýdyń 5107 jaǵdaıy anyqtaldy. 100 myń adamǵa kórsetkish - 932,4. Respýblıka boıynsha ortasha kórsetkish – 647,5. Bul - el boıynsha joǵary kórsetkishterdiń biri. ıAǵnı, óńirde aýrýdy anyqtaý deńgeıi joǵary. Iıa, aqparatta qaıshylyqtar bar. Onyń qazir neden bolǵanyn anyqtap jatyrmyz. Oblysta aýrý juqtyrýdyń 300 jaǵdaıy syrttan kelgenderden anyqtaldy. Onyń ishinde basqa óńir turǵyndary da bar. Biraq SQO-da anyqtalǵandyqtan ortaq statıstıkaǵa kiredi. Osy statıstıkalyq málimetterdi óńdeýde qate ketýi múmkin», - dedi Áset Jumataev.
Eske sala keteıik, búgin QR Premer-Mınıstriniń orynbasary Eraly Toǵjanovtyń tóraǵalyǵymen Vedomstvoaralyq komıssııanyń otyrysy ótti.
Jıynda koronavırýs órship turǵan óńirlerdi tezirek «qyzyl aımaqtan» shyǵarý jóninde sheshim qabyldandy.
Sondaı-aq búgin Petropavldaǵy jańa ınfektsııalyq aýrýhana alǵashqy syrqattardy qabyldaı bastaǵanyn habarlaǵan bolatynbyz.