SQO-da koronavırýs ınfektsııasyn juqtyrǵan bir adam aýyr halde jatyr
PETROPAVL. QazAqparat – Soltústik Qazaqstan oblysynda 35 adam juqpaly aýrýlar bóliminde em alyp jatyr, úsheýiniń jaǵdaıy ortasha bolsa, bireýiniń jaǵdaıy aýyr, dep habarlaıdy QazAqparat tilshisi.
Búgin SQO ákiminiń orynbasary Asqar Saqypkereev onlaın brıfıng barysynda óńirde qaýipti indettiń taralmaýyna qatysty qolǵa alynǵan is-sharalar jaıynda aıtty.
SQO-da aýrý belgileri joq 84 jaǵdaı tirkeldi. Infektsııa negizinen shetten kelgenderde anyqtaldy. Olar negizinen vahtalyq ádispen jumys isteıdinder, stýdentter jáne júk tasymalymen aınalysatyndar. 48 adam táýir boldy.
Qazirgi tańda juqpaly aýrýlar bóliminde 35 adam em alyp jatyr. 31-iniń jaǵdaıy qalypty bolsa, úsheýiniki – ortasha, al bir adamnyń basqa da aýyr dertteriniń bolýyna baılanysty jaǵdaıy múshkil.
«Memlekettik shekarada burynǵysynsha úsh sanıtarlyq-baqylaý pýnktteri jumys istep jatyr. Kúndelikti bul jerlerden 400-deı adam ótedi. Shekkaradan ótkenderdiń barlyǵy mindetti túrde COVID-19 tekseriledi. Oblysta osylaısha 36 myń zertteý júrgizildi. Qajet bolǵan jaǵdaıda barlyǵyna medıtsınalyq kómek kórsetiledi», - deıdi oblys ákiminiń orynbasary.
SQO-da 28 sáýirden bastap karantındik rejım birtindep jeńildetildi. 80 myńnan astam adam jumysyna oraldy. Oblysishilik, oblysaralyq qatynas qalpyna keldi.
«Karantın sharalary alynbaǵanyn esten shyǵarmaýymyz kerek. Infektsııany juqtyrý qaýpi áli de joǵary. Jaqynda COVID-19 úsh jasar baladan anyqtaldy. Іndet oǵan Qazaqstannyń ońtústiginen aýyryp kelgen ákesinen juqqan. Saldarynan balabaqshany 14 kúnge karantınge japtyq, barlyq baılanysta bolǵan adamdar anyqtaldy. Sol sebepti biz jaǵdaıda únemi baqylaýda ustap otyrmyz», - deıdi Asqar Saqypkereev.
Oblys ákimi orynbasarynyń aıtýynsha, SQO-da tek sońǵy úsh táýlikte aýyrǵandar sany birden 16,6% artty. Osyǵan baılanysty aýmaqtyq komıssııa buǵan deıin josparlanǵan birneshe nysannyń ashylýyn keıinge qaldyrdy.
Buǵan deıin SQO-da karantın talaptary qatańdatylǵanyn aıtqan edik.
Al Taıynsha qalasynda sońǵy 3 kúnde qaýipti indetti juqtyrýdyń 4 deregi tirkelip, endi eldi meken karantınge jabylmaq .
