SQO-da koronavırýs ınfektsııasy tabylǵan aýdandarǵa blokpost qoıyldy
Soltústik Qazaqstan oblystyq polıtsııa departamenti baspasóz qyzmetiniń málimetinshe, tártip saqshylary men sanıtarlyq dárigerler saýda úılerinde, bazarlarda, qyzmet kórsetý nysandarynda maska kıip júrý rejımi men basqa da profılaktıkalyq is-sharalardyń qanshalyqty saqtalatynyn tekserdi.
Tártip saqshylarynyń aıtýynsha, «Qurmetti satyp alýshylar! Betperdesiz kelgenderge taýar satylmaıdy» delingen eskertý mańdaıshalary barlyq saýda oryndarynda ilýli tur. Alaıda satyp alýshylar men satýshylardyń ózderi árqashan bul talapty oryndaı bermeıdi.
Bul joly eshqandaı ákimshilik yqpaly bar sharalar qoldanylǵan joq, ázirshe túsinik pen eskertý berildi.
SQO-da koronavırýs ınfektsııasynyń taralýyna baılanysty naýqastar sany kúnnen-kúnge artyp keledi. Osyǵan oraı mamandar karantın sharalarynyń kúsheıtiletinin joqqa shyǵarmaıdy. Al karantın rejımin saqtamaǵany úshin QR Ákimshilik quqyq buzý týraly kodeksiniń 462-baby boıynsha aıyppul túrindegi jaza qarastyrylǵan.
«Qazir Reseımen shekaralas aýdandarda úsh blokpost jumysyn jalǵastyrýda. Sondaı-aq qazirgi tańda koronavırýstyń oshaǵy anyqtalǵan aýdandarǵa blokpostar qoıyldy. Olardyń sany búginde 11-ge jetti, ol nysandarda polıtseıler qyzmet atqarýda», - deıdi SQO PD Jergilikti polıtsııa qyzmeti basqarmasy bastyǵynyń orynbasary Aleksandr Rozbah.