SQO-da koronavırýs anyqtalǵan bes adamnyń tórteýi Reseıden kelgen
PETROPAVL. QazAqparat – Soltústik Qazaqstan oblysynda koronavırýs ınfektsııasy anyqtalǵan bes adamnyń tórteýi — Reseıden kelgender, dep habarlaıdy QazAqparat tilshisi.
Shuǵyl shtabtyń málimetinshe, COVID-19 juqtyrǵan 48, 36 jáne 29 jastaǵy er adamdar Reseıdiń Omby qalasynda vahtalyq ádispen jumys isteıtin Qazaqstan azamattary. Tórtinshisi - 32 jastaǵy el azamaty Reseıdiń Rýbtsovsk qalasynan kelgen, júk tasymaldaýshy bolyp jumys isteıdi.
Er adamdarda KVI klınıkalyq belgileri baıqalmaıdy. Kelgen soń COVID-19-ǵa tekserilip, karantındik statsıonarǵa jatqyzyldy.
Sondaı-aq, PTsR taldaý nátıjeleri boıynsha koronavırýstyq ınfektsııa 1988 jyly týǵan er adamda rastaldy. Er adam aýrý juqtyrǵan naýqaspen jaqyn qarym-qatynasta bolǵan. COVID-19-ǵa oń nátıjeler alǵannan keıin naýqastar Petropavldaǵy qalalyq aýrýhananyń juqpaly aýrýlar bólimshesine jatqyzyldy. Epıdemıologııalyq tekserý jalǵasýda.
31 mamyrdaǵy jaǵdaı boıynsha SQO aýmaǵynda qaýipti indetti juqtyrǵandar sany 59 adamǵa jetti.
