SQO-da koronavırýs anyqtalǵan azamat - Aqmola oblysynyń turǵyny
PETROPAVL. QazAqparat – Soltústik Qazaqstan oblysynda 2001 jyly týǵan azamattyń COVID-19 juqtyrǵany zerthanalyq túrde rastaldy, dep habarlaıdy QazAqparat tilshisi.
SQO Taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, búgin óńirde Aqmola oblysy turǵynynyń qaýipti indetti juqtyrǵany rastaldy.
«19 jastaǵy er adam 6 sáýir kúni Aqjar aýdanyna kelgen. Keıin kóktemgi egis jumystaryna baılanysty Ýálıhanov aýdanynda bolǵan. Al 12 sáýir kúni jedel respıratorlyq vırýstyq ınfektsııa belgilerimen Aqjar aýdandyq aýrýhanasyna júgingen. Ol osy aýrýhanadaǵy juqpaly aýrýlar bólimshesine jatqyzyldy», - delingen málimette.
Qazirgi tańda epıdemıologııalyq tekserý júrgizilip, onymen qarym-qatynasta bolǵan tulǵalar anyqtalyp jatyr.
13 sáýirdegi jaǵda boıynsha SQO-da COVID-19 juqtyrǵandar sany 26-ǵa jetti. Syrqattardyń bireýi jazylyp, úıine jiberilse, qalǵan 25-i statsıonarda em qabyldap jatyr.
