SQO-da koronavırýs anyqtalǵan 3 adam Reseıde jumys istegen
PETROPAVL. QazAqparat – Soltústik Qazaqstan oblysynda koronavırýs ınfektsııasy anyqtalǵan úsh adam Reseıdiń Omby qalasynda jumys isteıdi, dep habarlaıdy QazAqparat tilshisi.
Shuǵyl shtabtyń málimetinshe, COVID-19 anyqtalǵan er adamdardyń ekeýiniń jasy 37-de, bireýi – 33-te. Omby qalasyndaǵy qurylys kompanııalarynyń birinde vahtalyq ádispen jumys isteıdi. Olar 25 mamyr kúni Reseıden elge M.Jumabaev atyndaǵy aýdannyń «Qaraqoǵa» beketi arqyly kirgen. COVID-19-ǵa tekserilip karantındik statsıonarǵa ornalastyryldy.
Saraptama azamattardyń koronavırýstyq ınfektsııany juqtyrǵanyn kórsetti. Qazir olar birinshi qalalyq aýrýhanaǵa jatqyzyldy. Bekitilgen hattamaǵa sáıkes emdeý bastaldy. Mamandardyń aıtýynsha, barlyq úsh adamnyń jalpy jaǵdaıy qanaǵattanarlyq, klınıkalyq belgileri joq. Naýqastarmen 6 adam jaqyn baılanysta bolǵandyǵy anyqtaldy, olar da COVID-19-ǵa tekserildi, tekserý nátıjeleri teris.
Jalpy, 26 mamyrdaǵy jaǵdaı boıynsha SQO aýmaǵynda COVID-19 vırýsyn juqtyrǵan 49 adam tirkelgen.
