SQO-da kópirden sekirmek bolǵan jigit qutqaryldy

PETROPAVL. KAZINFORM – Soltústik Qazaqstan oblysynda kópirden sekirmek bolǵan er adamdy jaqyn mańda júrgen polıtseıler aman alyp qaldy. 

SQO polıtsııa departamenti baspasóz qyzmetiniń málimetinshe, oqıǵa 5 qarasha kúni saǵat 19.00 shamasynda bolǵan. Patrýldik polıtsııa batalonynyń qyzmetkerleri Konstantın Penkov pen Rýslan Kasımov «Astana-Petropavl» avtojolynda kezekshilikterin atqaryp júrip, jol shetindegi janar-jaǵarmaı stantsııasynyń aýmaǵynda «Toyota Corolla» avtokóliginiń janynda turyp, janjaldasqan jigit pen qyzdy baıqap qalady. 

Zań buzýshylyqtarǵa jol bermes úshin tártip saqshylary jastarǵa jaqyndap, jaǵdaıdy suraǵanda, jigit «bári durys» dep sendirmek bolǵan. Keıin polıtseıler jigittiń kenetten kópir jaqqa júgirip bara jatqanyn baıqap qalady. Batalon qyzmetkerleri jedel áreket etip, temir qorshaýǵa minip sekirmek bolǵan jigitti ustap úlgerdi. Al birazdan keıin ashýy basylyp, ózine kelgen azamat óz áreketine ókinishin bildirip, tártip saqshylaryna alǵys aıtty.

Buǵan deıin SQO-da belgili sportshynyń otbasy 23 jastaǵy jigitti quldyqta ustaǵanyn jazǵan edik.