SQO-da kóppáterli turǵyn úılerdiń jartysyna kúrdeli jóndeý qajet
PETROPAVL. KAZINFORM – Soltústik Qazaqstan oblysynda 1,9 myńǵa jýyq kóppáterli turǵyn úı bar. Bul baspanalardyń 50-i apatty dep tanylsa, 279-ynyń tozyǵy jetken.
SQO qoǵamdyq keńeste turǵyn úı salasynyń máseleleri men turǵyn úı zańnamasyn jetildirýge qatysty usynystar aıtyldy. Energetıka jáne turǵyn úı-kommýnaldyq sharýashylyǵy basqarmasynyń málimetinshe, Petropavl qalasynda 1197 jáne aýdandarda 700 kóp qabatty úı bar. Onyń 1,4 myńy ǵana ortalyqtandyrylǵan jylýǵa qosylǵan.
«Aýdan jáne Petropavl qalasy ákimdikteriniń usynǵan málimetterine sáıkes Petropavlda 28 apatty jáne 210 eski úı ornalasqan. Oblysta «turǵyn úıi apatty dep tanylǵan QR azamattary» sanaty boıynsha turǵyn úıge kezekte 211 adam tur.
2023 jylǵy 9 naýryzda SQO boıynsha apatty jáne tozyǵy jetken turǵyn úılerdi buzý arqyly 2029 jylǵa deıin jańa turǵyn úımen qamtamasyz etý jónindegi jol kartasy bekitildi. Qujatqa sáıkes bes jyl ishinde 86 apatty jáne tozyǵy jetken úı buzylyp, 569 páter ıesin jańa turǵyn úımen qamtý josparlanǵan», - deıdi SQO Energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Janat Sádýaqasov.
Jalpy óńirde kúrdeli jóndeýdi qajet etetin kóppáterli turǵyn úılerdiń úlesi – 49%.
«2011-2023 jyldar aralyǵynda 224 turǵyn úıge kúrdeli jóndeý júrgizildi, onyń ishinde jalpy somasy 4 202,2 mln teńge bólingen qarajatqa 187 turǵyn úı, 725,24 mln teńge qaıtarymdy qarajatqa 33 turǵyn úı jáne oblystyq bıýdjet qarajaty esebinen 279,3 mln teńgege 4 úı jóndeldi.
Bıyl Petropavlda 535,7 mln teńgegekóppáterli 6 turǵyn úıdi jóndeý josparlanǵan. Taıynsha qalasynda 28,2 mln teńgege úıdi jóndeýge qujattama bar.
Sondaı-aq 11 úıdi jóndeýge qujattama ázirlenýde, onyń ishinde 7 úıdiń shatyry aýystyrylady, 4 úıge lıft ornatylady», - deıdi Janat Sádýaqasov.
