SQO-da kópqabatty baspana men shaǵyn ortalyq paıdalanýǵa berildi
PETROPAVL. QazAqparat – Petropavl qalasynda 100 páterli turǵyn úı men «Nur-bóbek» bóbekjaı-baqshasy paıdalanýǵa berildi, dep habarlaıdy QazAqparat tilshisi.
Soltústik Qazaqstan oblysy ákiminiń baspasóz qyzmeti habarlaǵandaı, Qumar Aqsaqalov Bereke yqshamaýdanyndaǵy 100 páterli úıdiń turǵyndarymen kezdesip, qonys toımen quttyqtady. Kópbalaly, tolyq emes otbasylarǵa, múgedekterge, jetimder men soǵys ardagerlerine jaldamaly-kommýnaldyq páter berildi.
«Bıyl 8 myńnan asa adam páterge ıe boldy. Onyń ishinde 126-sy kóp balaly otbasy. 3 jylda kópbalaly otbasylardy baspanamen tolyq qamtamasyz etemiz», - dep jazdy óńir basshysy jeke paraqshasynda.
Mamandardyń málimetine súıensek, bıyl 2240 páterdi qoldanysqa berý josparlanǵan. Al kelesi jyly 2842 páter salynbaqshy.
Bul kúni Petropavlda jańa shaǵyn ortalyq ta saltanatty túrde ashyldy. «Nur-bóbek» atty bóbekjaı-balabaqsha 3 jasqa deıingi sábılerdi qabyldaıdy. Jańadan salynǵan kóp páterli turǵyn úıdiń birinshi qabatynda ornalasqan ortalyq 44 balaǵa shaqtalǵan. Olardyń tárbıesimen 16 maman aınalysady.
«Búginde 3 pen 6 jas aralyǵyndaǵy barlyq balalar balabaqshaǵa barady. Endigi maqsat: 3 jasqa deıingi búldirshinderi qamtamasyz etý. Bul úshin kópqabatty úılerde shaǵyn ortalyqtardy ashatyn bolamyz», - dedi Qumar Aqsaqalov.
Bóbekjaı baqshada balǵyndar 4 mezgil tamaqtanady. Baǵasy 12-16 myń teńge shamasynda bolmaq. Kóp páterli úıdiń birinshi qabatynda ornalasqandyqtan turǵyndar úshin óte yńǵaıly. Al keler jyly óńirdegi balabaqshalarǵa bıýdjet esebinen kúrdeli jóndeý júrgizilmek.
