SQO-da kópqabatty turǵyn úılerdiń shamamen tek úshten biri ǵana basqarýdyń jańa formatyna kóshti
PETROPAVL. KAZINFORM — Petropavlda «TURGYNDAR AMANATY» óńirlik forýmy ótip, kópqabatty úılerge qatysty ortaq máseleler talqyǵa tústi.
«AMANAT» partııasy Soltústik Qazaqstan oblystyq fılıalynyń málimetinshe, búginde óńirde 1 920 kópqabatty turǵyn úı bar. Onyń 502 menshik ıeleri birlestigi jáne 198 páter ıeleri kooperatıvi tirkelgen. Kúrdeli jóndeý jáne abattandyrý baǵdarlamalary júzege asyrylyp jatqanyna qaramastan, salada júıeli máseleler jeterlik. Atap aıtqanda, turǵyn úı qorynyń tozýy, bilikti mamandardyń jetispeýshiligi jáne kúrdeli jóndeýge arnalǵan jınaq kóleminiń jetkiliksizdigi ózekti bolyp otyr.
— Turǵyn úı reformasy — bir rettik naýqan emes. Bul — adamdarmen, úılermen jáne zańnamamen kúndelikti jumys. Memleket jaǵdaı jasaýy kerek, bıznes sheshim usynýy tıis, al menshik ıeleri óz turǵyn úıine jaýapkershilikpen qaraýy qajet. Tek osy úshtik arqyly naqty nátıjege qol jetkizýge bolady. Kópqabatty turǵyn úılerdi basqarý júıesi ashyq, kásibı ári ár turǵynǵa túsinikti bolatyn óńirge aınalýdy maqsat ettik. Búgingi forým — osy baǵyttaǵy taǵy bir mańyzdy qadam, — dedi SQO ákimi Ǵaýez Nurmuhambetov.
«AMANAT» partııasy bul baǵytta oqytý kýrstaryn uıymdastyrý, qalalyq keńester qurý jáne ákimdiktermen ózara is-qımyldy arttyrý arqyly kúsheıtýdi josparlap otyr.
Forýmǵa qatysýshylar turǵyn úı-kommýnaldyq sharýashylyǵy salasyn tsıfrlandyrý, «Halyq qatysatyn bıýdjet» baǵdarlamasyn damytý, «OSI-SKILLS» oqytý semınarlaryn iske qosý, sondaı-aq zańnamany jetildirý máselelerin talqylady.
Buǵan deıin Almatyda MIB men PIK qyzmetine baqylaý kúsheıetindigin jazǵan edik.
