SQO-da kópbalaly otbasy eshki sútin paıdaǵa jaratyp, ıogýrt óndirisin jolǵa qoıǵan
PETROPAVL. KAZINFORM – Soltústik Qazaqstan oblysynda «Bir aýyl – bir ónim» jobasynyń fınalısteri belgili boldy.
SQO kásipkerler palatasy baspasóz qyzmetiniń málimetinshe, on úzdiktiń qatarynda Taıynsha aýdanyndaǵy jeke kásipker Serik Kshýkbaevtyń otbasylyq bıznesi de bar. Olar 2021 jyldan beri eshki sútinen tabıǵı ıogýrt, irimshik jáne ózge de ónimder óndirýmen aınalysady.
Ótken jyly da baıqaýǵa qatysqan olar jeńimpazdar qataryna ene almaǵanymen, bıyl eńbektiń nátıjesi jemisin berdi.
- Bizdiń fermada 60-qa jýyq eshki bar, onyń 40-y saýyndy. Alǵashynda balalarymyzdy tabıǵı ónimmen qamtamasyz etý úshin bastaǵan edik. Qazir bul iske búkil otbasy jumylǵan. Jubaıym ekeýmiz sharýashylyqty júrgizip, sútti óńdeımiz, al balalarymyz belsendi kómek kórsetedi. Búginde ónimderimizge Taıynsha, Kókshetaý jáne Astana qalalarynan turaqty tapsyrys túsedi, – deıdi kásipker.
Elimizde «Bir aýyl – bir ónim» jobasy 2023 jyldan beri bar. Basty maqsat – ár óńirdiń ereksheligin tanytatyn, jergilikti shıkizattan óndiriletin jáne naryqta básekege qabiletti ónimderdi damytýdy qoldaý. Sonymen qatar joba otandyq taýarlardyń sapasyn arttyryp, óńirlik brendterdi qalyptastyrýǵa jáne olardyń naryqtaǵy qunyn kóterýge baǵyttalǵan.
Bıyl jobaǵa 42 kásipker qatysyp, óz ónimderin tanystyrǵan bolatyn. Onyń 20-sy ekinshi kezeńge joldama aldy.
- Fınalǵa shyqqan on jeńimpazymyz bar. Kásipkerlermen aldaǵy ýaqytta Ulttyq kásipkerler palatasynyń tájirıbeli tehnologtary men marketologtary jumys isteıdi. Jeńimpazdarǵa bıznesterin keńeıtýge, ónimderin iri naryqtarǵa shyǵarýǵa jan-jaqty qoldaý kórsetiledi. Sonymen qatar olar óz kásipterin damytýǵa arnalǵan 5 mln teńge grantqa úmitker atandy, - deıdi SQO Kásipkerler palatasynyń dırektory Esjan Orazalın.
Brend-komıtet músheleriniń aıtýynsha, qatysýshylar birneshe mańyzdy talap boıynsha baǵalanǵan. Eń aldymen ónim quramyndaǵy jergilikti shıkizattyń úlesi keminde 70% bolýy qajet. Sondaı-aq qolóner men kraft óndirisine, ónimniń biregeıligine, dızaıny men qaptamasynyń tartymdylyǵyna erekshe nazar aýdarylǵan.
Budan bólek, kásipkerdiń tájirıbesi, turaqty jumysshylarynyń bolýy jáne ónimdi ótkizýdiń naqty naryǵy da eskerilgen.
Endi jeńimpazdar SQO atynan respýblıkalyq «Bir aýyl – bir ónim» kórmesine qatysady. Bul kezeńde olar brend qalyptastyrý, ónimdi sertıfıkattaý, marketıngtik súıemeldeý jáne ishki ári syrtqy naryqtarǵa shyǵarý boıynsha kásibı qoldaýǵa ıe bolady.
Buǵan deıin Shymkentte kásipker úshin jol tańbasy ózgertilip, júk tasymaly jeńildetilgenin jazǵan edik.
