SQO-da kóp jyldan beri tergelip jatqan 153 qylmys ashyldy

PETROPAVL. QazAqparat - Soltústik Qazaqstan oblysynyń polıtsııa departamenti bastyǵy, polıtsııa polkovnıgi Aıdyn Qabduldınov vedomstvonyń Facebook akkaýntynda tikeleı efırde esep berdi, dep habarlaıdy QazAqparat.

Oblystyq polıtsııanyń basshysy 2021 jyldyń qorytyndysy boıynsha SQO-da qylmystyń jalpy sany 5,6%-ǵa azaıǵanyn atap ótti.

Jasóspirimder jasaǵan qylmys ta 13,6%-ǵa azaıǵan.

Ótken jyldardaǵy 153 qylmys ashylyp, 34 qylmysker ustalǵan, iz-tússiz joǵalǵan 23 adam izdep tabylǵan.

Sonymen qatar, jumystyń mańyzdy nátıjesi — mal urlyǵynyń 38,3%-ǵa azaıýy.

197 esirtki qylmysy, onyń ishinde esirtki ótkizýdiń 59 jáne shekara arqyly esirtki zattaryn kontrabandalyq jolmen tasymaldaýdyń 11 faktisi anyqtaldy.

Zańsyz aınalymnan 410 keliden asa túrli esirtki men psıhobelsendi zattar, onyń ishinde 4 keliden astam sıntetıkalyq esirtki alyndy.

«Polıtsııanyń jańa statsıonarlyq modýldik beketteri ashyldy, «patrýldeý ýchaskeleri boıynsha derekter kestesin qurý» engizildi; turǵyn úılerdi, saıabaqtardy, skverlerdi qamtıtyn jaıaý patrýlderdiń sany artty. Aýyldyq jerlerde halyqqa qyzmet kórsetý sapasyn jaqsartý úshin biz polıtseılerge turǵyn jaımen biriktirilgen jańa, yńǵaıly polıtsııanyń ýchaskelik pýnktin salýdamyz. Mamlıýt pen Ýálıhanov aýdandarynda olar qoldanysqa berildi. Bıyl taǵy osyndaı turǵyn jaımen biriktirip salynǵan 4 ýchaskelik pýnktti ashýdy josparlap otyrmyz. Ondaǵy maqsat - ýchaskelik ınspektordyń 24/7 rejıminde halyqqa jaqyn, óziniń ákimshilik ýchaskesinde ómir súre otyra ondaǵy barlyq jaǵdaıdan habardar bolýy», — dep atap ótti SQO polıtsııa departamentiniń bastyǵy.

Oblysta 474 jalpy bilim beretin mektep, Petropavlda 46, aýdandarda 428 jalpy bilim beretin mektep bar. Olar beınebaqylaý júıesimen jabdyqtalǵan.

Mektepterdiń kameralarynan túsirilgen beınejazbalardy Jedel basqarý ortalyǵy men aýdandyq polıtsııa bólimderiniń kezekshi bólimderinen kórýge bolady.

Búgingi tańda mektepterdiń 60%-ǵa jýyǵy polıtsııa bólinisterine qosylǵan.

Mektepter beınebaqylaýdan bólek, dabyl knopkalary, metall izdegishter, týrnıketter, kirý júıeleri, eskertý qurylǵylarymen jáne órt dabylymen jabdyqtalǵan.⠀⠀⠀⠀⠀⠀⠀

Aıdyn Qabduldınov buzaqylyqtyń aldyn alý maqsatynda patrýldik baǵyttardyń júıeli túrde rettelip, túngi klýbtarǵa, dámhanalarǵa jáne azamattardyń demalysyna arnalǵan basqa da oryndardyń mańynda polıtsııa jasaqtarynyń qyzmet atqaratynyn atap ótti.

Jol qozǵalysy qaýipsizdigin qamtamasyz etý baǵytynda aǵymdaǵy jyly respýblıkalyq mańyzy bar avtomobıl joldarynda 8 jáne Petropavl qalasynyń jol jelisinde 14 jyldamdyqty retteý júıesin ornatý josparlanýda.

Sonymen qatar, avtonomdy rejımde jumys isteıtin 2 ıntellektýaldy jol qıylysy ornatylady.