SQO-da qonys aýdarýshylarǵa salynǵan ár úshinshi úı - sapasyz
Bul jaıynda SQO qoǵamdyq keńes otyrysynda aıtyldy. Jumys kúshi artyq óńirlerden qonys aýdarýshylar sýbsıdııa alýmen qatar, jumyspen, baspanamen qamtyldy. Sońǵy úsh jylda «Eńbek» baǵdarlamasyn júzege asyrý aıasynda oblys aýdandarynda salynǵan 1 206 úı satyp alyndy. Bul maqsatqa 8,630 mlrd teńge jumsalǵan.
«Monıtorıng jáne úılerdi tekserý barysynda 485 baspananyń júrdim-bardym salynǵany anyqtaldy. Olardyń 472-si búginde jóndeldi, 13 úı boıynsha jumystar áli aıaqtalǵan joq. Bul baspanalardyń 6-y Aıyrtaý aýdanynda ornalasqan. Sot arqyly merdigermen kelisimge keldik. Qurylysshylar osy jyldyń 31 mamyryna deıin kem-ketikti túzeýleri tıis. Al qalǵan úıler Mamlıýt jáne Taıynsha aýdanynda turǵyzylǵan», deıdi SQO Qurylys, sáýlet jáne qala qurylysy basqarmasy basshysynyń orynbasary Qaırat Mustafın.
Basqa óńirlerden kelgen aǵaıynǵa arnalǵan úılerdiń keıbiriniń shatyrynan sý aqsa, endi biriniń edeni durys tóselmegen. Kireberis esik sapasyz ornatylyp, santehnıka qoıylmaǵan.
«Baspanalardyń mańyna qora-qopsy salýǵa, septık qazdyrýǵa, qorshaýǵa, elektr jáne sýmen jabdyqtaýǵa, joldardy jóndeýge aýdan jáne oblys bıýdjetinen 800 mln teńge jumsaldy. Baǵdarlama aıasynda tek úılerdi satyp alýǵa ǵana qarajat bólindi. «Eńbek» baǵdarlamasy aıaqtalǵanymen Eńbek, áleýmettik qorǵaý jáne kóshi-qon komıteti jumys kúshi kóp óńirlerden qonys aýdarýshylarǵa qatysty jańa erejeler qalyptastyrmaq. Qazir olar ádilet organdaryna tirkeýge jiberildi.
Erejede qonys aýdarýshylardy turǵyn úımen qamtamasyz etýdiń úsh tetigi bar: úılerdi satyp alý, baspana qurylysy, jumys berýshilerdiń shyǵyndaryn sýbsıdııalaý. Turǵyn úı qurylysy jumys berýshiniń 15 %-y qosa qarjylandyrýymen salynady. Sondaı-aq «jaldaý aqysyn 50 de 50 sýbsıdııalaý qaǵıdalary» engizilmek. Bul boıynsha óńirde 63 úı daıyn tur», - deıdi Qaırat Mustafın.
Osyǵan deıin SQO-da emhana ǵımarattarynyń 75 paıyzy tozǵany týraly jazdyq.
