SQO-da qonys aýdarýshylarǵa salynǵan 14 jańa úı buzyldy
PETROPAVL. KAZINFORM — Soltústik Qazaqstan oblysy Sergeevka qalasynda qonys aýdarýshylarǵa memlekettik baǵdarlamamen salynǵan úıler turýǵa jaramsyz dep tanylǵan.
Áleýmettik jelide taraǵan beınejazba ıesiniń aıtýynsha, Qadyralın kóshesindegi bul úıler kóp ýaqyt boıy bos turǵan.
- Úılerdi buzyp, shashylǵan qoqysty jınap jatyr. Bul úılerdiń bári qırap turǵan edi, - deıdi qala turǵyny.
Birneshe jyl buryn arnaıy salynǵan úılerge, jergilikti turǵyndardyń aıtýynsha, qonys aýdarýshylar kelgenimen, kótermeaqy alyp ketip qalǵan. Baspanaǵa muqtaj qala turǵyndaryna bermegen.
Taǵy bir oqyrman olardyń aýyldaryna da osyndaı on úı salynǵanyn, olardyń da qazir bos turǵanyn jazdy.
- Osydan 6-7 jyl buryn bul úılerdiń árqaısysyn 8 mln teńgege salyp edi. Sol kezde aýyldan kóshkender ózderiniń jaqsy baspanalaryn 4 mln teńgege sata almady. Nege memlekettik qarjyny jelge ushyrǵansha, sol kezde aýyldan ketkenderdiń úıin satyp almady, - deıdi ol.
Shal aqyn aýdany ákimdigi áleýmettik jelide paıda bolǵan beınejazbaǵa qatysty túsinik berdi.
- Bul úıler tehnıkalyq tekserý aktisine sáıkes apatty dep tanylýyna baılanysty buzyldy. Qazirgi ýaqytta aýmaqty tazalaý jáne qurylys qaldyqtaryn shyǵarý jumystary júrgizilip jatyr. Jaqyn kúnderi qurylys qaldyqtary tolyqtaı shyǵarylyp, aýmaq tazalanady, - delingen ákimdik jaýabynda.
Sergeevka qalasynda qonys aýdarýshylarǵa arnalǵan 14 baspana buzyldy.
Buǵan deıin SQO-ǵa jyl bastalǵaly eńbek kúshi artyq óńirlerden úsh myńǵa jýyq adam kóship kelgenin jazǵan edik.
