SQO-da qonys aýdarý baǵdarlamasy boıynsha bólingen qarjyny urlaý faktileri anyqtaldy

ASTANA. KAZINFORM - Soltústik Qazaqstan oblysynyń prokýrorlary qonys aýdarý baǵdarlamasy boıynsha bıýdjet qarajatyn urlaý faktilerin anyqtady, dep habarlaıdy oblystyq prokýratýrasynyń baspasóz qyzmeti.

Bapasóz qyzmetiniń málimetterine qaraǵanda, qadaǵalaý organy tekserýler aıasynda áleýmettik sharttyń qabyldanǵan mindettemelerin oryndamaý jáne turǵyn úı qunyn asyra baǵalaý úshin qoldanystaǵy zańnamanyń óreskel buzylǵanyn anyqtady.

Osylaısha, Aıyrtaý, Ǵ.Músirepov, Jambyl aýdandarynda Qonys aýdarý baǵdarlamasyna qatysýshylar Áleýmettik kodekstiń talaptaryna jáne adamdardy erikti túrde qonys aýdarý qaǵıdalarynyń talaptaryna qaramastan, turǵyn úıdi satyp alý shyǵyndaryn óteýge memlekettik ótemaqyny barynsha kóp alý úshin olardyń naqty qunyn asyryp asyryp kórsetken.

Osyndaı zańsyz áreketterden memleketke jalpy somasy 11,3 mln teńge shyǵyn keltirilgen.

Osy faktilerge súıene otyryp, prokýratýra Qylmystyq kodekstiń 190-babyna (alaıaqtyq) sáıkes, sotqa deıingi tergep-tekserý jumystaryn bastady.

Aýdandyq sot úkimimen Baǵdarlamanyń 3 qatysýshysynyń bas bostandyǵy bir jyldan úsh jylǵa deıingi merzimge shekteldi.

Sonymen birge, Áleýmettik shart boıynsha óz mindettemelerin buza otyryp, memleketten qarjylaı kómek alǵan Qonys aýdarý baǵdarlamasyna qatysýshylar turaqty turý úshin qonys aýdarǵan ornynan respýblıkanyń basqa aımaqtaryna kóshken.
Osyǵan qaramastan, jergilikti atqarýshy organdardyń sheneýnikteri 103,6 mln teńge kólemindegi tólemderdi óndirip alý sharalaryn qoldanbaǵan.

Prokýrorlyq qadaǵalaý aktilerine sáıkes, jergilikti atqarýshy organdardyń 25 qyzmetkeri (onyń ishinde Mansap ortalyqtary fılıalynyń 11 basshysy) tártiptik jaýapkershilikke tartylyp, 19,1 mln teńge kólemindegi bıýdjet qarajaty óteldi.

Qalǵan somaǵa talap aryzdar sotqa berilip, qaralýda.

Bıýdjettik qarajatty jumsaý máselesi oblystyq prokýratýranyń baqylaýynda.

Osyǵan deıin prokýratýranyń tekserýinen keıin Aqsýda páter jaldaý aqysy arzandaǵany týraly jazdyq.