SQO-da kóńil-kóterý oryndarynda tótenshe jaǵdaı rejimin buzýǵa qatysty 25 derek anyqtaldy
PETROPAVL. QazAqparat – Soltústik Qazaqstan oblysynda polıtseıler ózge de ókiletti organdardyń qyzmetkerlerimen birlesip, tótenshe jaǵdaı rejiminiń saqtalýyn tekserý boıynsha jumysty jalǵastyrýda, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, reıdke qatysýshylar kóńil-kóterý oryndarynyń, qoǵamdyq tamaqtaný nysandary men saýda oryndaryn tekseredi. Óńirde tótenshe jaǵdaı rejimin saqtaý normalaryn túsindirý jáne osyndaı buzýshylyqtardyń aldyn alýda volonterler de kómek kórsetip jatyr.
Jergilikti polıtsııa qyzmetiniń mamandary Petropavlda sońǵy táýlik ishinde kompıýterlik klýbtardyń biriniń saǵat 22.00-den keıin jumys istegenin anyqtady. Onyń ıesine qatysty ákimshilik hattama toltyryldy.
Barlyǵy demalys kúnderi Petropavlda tótenshe jaǵdaı rejimin buzýdyń 8 faktisi tirkeldi, onyń 7-i - dámhana ıeleri tarapynan jasalǵan. Sh.Ýálıhanov aýdanynyń Kishkenekól aýylyndaǵy kóńil kóterý ornynda saǵat 22.00-den keıin kelýshiler bolǵan, osyǵan baılanysty dámhana ıesine qatysty ákimshilik materıal jınaldy. Kásipkerdiń qandaı jazaǵa tartylatynyn sot sheshetin bolady.
«Tótenshe jaǵdaı rejimi – koronavırýs ınfektsııasynyń taralýyna tosqaýyl jasaý úshin qabyldandy. Belgili bir qaǵıdalardy saqtaǵanda ǵana ol óz nátıjesin bermek. Turǵyndar osyndaı shekteýge túsinistikpen qaraýy tıis, bul birinshi kezekte azamattardyń ózderiniń qaýipsizdigi úshin qajet. Sonymen qatar tártip saqtaýǵa shaqyramyz», - deıdi SQO PD bastyǵynyń birinshi orynbasary Qanat Aıtbaev.
Jalpy SQO-da birer kúnde QR Ákimshilik quqyq buzýshylyq týraly kodeksiniń 476-babyn buzýdyń 25 deregi anyqtaldy. Atalǵan bap boıynsha aıyppul nemese 15 táýlikke deıin ákimshilik qamaqqa alý túrindegi jaza kózdelgen.
