SQO-da qonaqtardyń qaýipsizdigin týrıstik polıtsııa qamtamasyz etedi
PETROPAVL. KAZINFORM – Soltústik Qazaqstan oblysynyń Imantaý-Shalqar kýrort aımaǵynda qoǵamdyq tártipti shildeden bastap týrıstik polıtsııa qyzmetkerleri qadaǵalap keledi.
SQO Polıtsııa departamenti baspasóz qyzmetiniń málimetinshe, Aıyrtaý aýdany aýmaǵyndaǵy Imantaý-Shalqar kýrort aımaǵynda 48 demalys orny, 3 balalar saýyqtyrý ortalyǵy bar, sondaı-aq demalýshylarǵa 516 úı jalǵa beriledi.
«Imantaý» jáne «Shalqar» demalys aımaqtarynyń árqaısysyna 4 ýchaskelik polıtsııa ınspektory bekitilgen. Týrıster sanynyń artýyna baılanysty jaqynda Aıyrtaý aýdandyq polıtsııa bóliminiń shtattyq quramyna týrıstik polıtsııa qyzmetiniń 2 ınspektory qosyldy.
Olar qazaq-orys tilderimen qatar aǵylshyn tilin meńgergen. Tártip saqshylary sheteldik týrısterge elde bolý erejelerin túsindiredi, týrızm nysandary ákimshiligimen únemi tyǵyz baılanysta. Osylaısha, týyndaǵan jaǵdaılarǵa jedel áreket etedi.
- Negizgi mindetteri – týrısterdiń, sonyń ishinde sheteldik qonaqtardyń qaýipsizdigin qamtamasyz etý, olarǵa qatysty quqyqbuzýshylyqtarǵa jol bermeý, kýrort aımaqtaryn turaqty patrýldeý. Kýrorttyq aımaqta 8 patrýldeý baǵyty bar, onyń 6-ýy jaıaý, 2-ýi avtokólikpen júzege asyrylady. Patrýldeýge ýchaskelik ınspektorlar da tartylǵan, - deıdi polıtseıler.
Buǵan deıin SQO-da sarapshylar jańa alaıaqtyq tásilderdi ataǵan edi.