SQO-da kommýnaldyq kásiporyn sýdyń tarıfin negizsiz ósirgen
PETROPAVL. KAZINFORM – Soltústik Qazaqstan oblysynyń prokýrorlary jergilikti kásipkerler palatasymen birlese Mamlıýtka qalasy turǵyndary men kásipkerlerdiń quqyǵyn qorǵap, sýdyń tarıfin tómendetti.
SQO prokýratýrasynyń málimetinshe, Mamlıýt aýdanynyń kommýnaldyq kásiporny Tarıfterdi belgileý qaǵıdalarynyń talaptaryn buzǵan. Osylaısha kásipkerlerden bıýdjettik uıymdarǵa bekitilgen tarıfpen, ıaǵnı tutynylǵan sýdyń ár m3 úshin 1318 teńge alyp kelgen. Qadaǵalaýshy organ óńirlik kásipkerler palatasymen birlese otyra bul máseleni zerdelep, zańsyzdyqty joıý týraly usynys engizdi.
«Usynysty qaraý qorytyndysy boıynsha kináliler jaýapkershilikke tartylyp, oblystyń tabıǵı monopolııalardy retteý basqarmasy 1 shildeden bastap turǵyndarǵa 1 m3 úshin 190-nan 99,24 teńgege deıin, al basqa tutynýshylarǵa 1318,72-den 688,81 teńgege deıin túsirip, sý tarıfin bekitti. Bul ýaqytsha ótemaqy tarıfi bolyp esepteledi. Qabyldanǵan qadaǵalaý sharalary Mamlıýtka qalasy turǵyndarynyń, onyń ishinde jergilikti kásipkerlerdiń quqyǵyn qorǵaýǵa múmkindik berdi», - delingen baspasóz habarlamasynda.
Osylaısha kommýnaldyq kásiporyn negizsiz alynǵan qarajatty tutynýshylarǵa tómendetilgen tarıfti qoldaný arqyly qaıtarady.
Buǵan deıin SQO-da artemia salina shaıanynyń 24 tonna jumyrtqasyn zańsyz óndirgender ustalǵanyn jazǵan edik.
