SQO-da kómir jetispeýshiligi máselesi sheshiler emes

PETROPAVL. QazAqparat – Soltústik Qazaqstan oblysynda kómir tapshylyǵynan uzyn-sonar kezek qalyptasty. Kúndelikti jetkizilip jatqan qara otyn qajettilikti jappaı otyr, dep habarlaıdy QazAqparat tilshisi.

SQO-da qystyń qamyn jazda jasamaǵandar endi kómir ala almaı sergeldeńge túsken. Áleýmettik jeli qoldanýshylary tuıyqtardyń birindegi jaǵdaıdy kórsetti. Júk kólikteriniń júrgizýshileri tań atar-atpastan kezekke turady. Kúndelikti kelip jatqan birer vagondy on shaqty mashına qyl ústinen bólip alyp, qalǵandary bos ketedi. Aıtýlarynsha, kúndelikti jaǵdaı osy.

«Mynaý jerge Shubarkól kómirin ákeledi. Búgin 10 vagon jetkizildi. Tonnasy 14 800 teńge turady. Bir vagonnyń kómirin qazir eki Kamaz artyp áketedi», - deıdi Petropavl turǵyny.

Jergilikti bılik ókilderiniń aıtýynsha, oblysqa jańa jylytý maýsymyna 365 myń tonna kómir jetkizilgen. Qazirgi ýaqytta turǵyndardyń 94 %-y kómirmen qamtylǵan.

«Óńirge kómir keshiktirilip jetkizildi. Oǵan «Qazaqstan temirjoly» AQ júk tasymaly sebep. Qazirgi ýaqytta másele sheshildi. Kómir tıelgen vagondar kelip jatyr. Keshe keshke qaraı 14 vagon Maıkóbe kómiri jetkizildi. Petropavl stansalarynda taǵy osynsha Qarajyra kómiri tur. Onyń beseýi tuıyqtarda. Shubarkól kómiri aldaǵy eki kún boıy satylady. Dúısenbi taǵy 10 vagon keledi dep kútip otyrmyz.

Kómir tapshylyǵy joq, óıtkeni ol kúnde jetkizilip jatyr. Iıa, Shubarkól kómiri bir aptadaı bolǵan joq, biraq ol másele qazir sheshildi. Sondaı-aq Petropavlǵa Qyzyljar, Esil jáne Shal aqyn aýdandarynyń turǵyndary kómir alý úshin keledi. Óıtkeni bul aýdandarda tuıyqtar joq», - deıdi SQO energetıka jáne turǵyn úı-kommýnaldyq sharýashylyǵy basqarmasynyń bas mamany Aıbolat Áýbákirov.

SQO-da kómirdiń baǵasy ózgergen joq. Qazirgi ýaqytta tonnasy 8 700 teńgeden 17 myń teńgege deıin turady. Al jetkizý baǵasy sońǵy kúnderi 7 myń teńgeden 9 myń teńgege deıin ósip ketken.