SQO-da kómir tapshylyǵynan júk kólikteriniń uzyn-sonar kezegi týyndady

PETROPAVL. QazAqparat – Petropavldaǵy temirjol tuıyqtarynyń birinde búgin 100-den astam júk kóligi jınalyp qaldy. Óńirde birneshe kúnnen beri kómir bolmaǵan, dep habarlaıdy QazAqparat tilshisi.

Soltústik Qazaqstan oblysynda bıyl qys bastalǵaly turǵyndar kómir tapshylyǵyn kórip otyr. Óńirge ákelingen qatty otyn qajettilikti tolyq ótemeıdi. Saldarynan temirjol tuıyqtarynda uzyn-sonar kezek. Keı kólik júrgizýshileri bos qaıtpaý úshin kezekke tańsáriden kelip turady eken.

«Tańǵy saǵat 6.00-de keldim. Men kelgende bul jerde biraz mashına turdy. Bilmeımin, ala alam ba, joq pa? Bir aptadan artyq kómir bolǵan joq», - deıdi Petropavl turǵyny Oleg Ivanov.

Búgin oblysqa 7 vagonmen 490 tonna «shubarkól» kómiri jetkizildi. Kóptiń kútkeni de osy otyn. Bir kólikke 5 tonnadan artyq artylmaıdy.

«4 aqpannan beri óńirge «shubarkól» kómiri jetkizilmedi. Sol sebepti búgin osyndaı uzyn kezek týyndaǵan. Qazir jolda 980 tonna «qarajyra» jáne 1190 tonna «shubarkól» kómiri kele jatyr. Budan basqa oblysqa kómir jetkizýshi aqpan aıyna 100 vagon kómirge 7 myń tonnaǵa tapsyrys berdi. Onyń 30 vagony keldi. Qatty otyn jylytý maýsymy aıaqtalǵanǵa deıin ákelinip turady», - deıdi SQO energetıka jáne turǵyn úı-kommýnaldyq sharýashylyǵy basqarmasynyń basshysy Baqyt Іlııasov.

Mamandardyń aıtýynsha, búgin tańerteń Petropavldyń temirjol tuıyqtarynda 1830 tonna kómir boldy. Onyń 140 tonnasy Ekibastuz kómiri, 1200 tonnasy – Maıkóbeniki. Qalǵany suranysqa ıe – Shubarkóldiki. Baǵa ósken joq, sapasyna qaraı 9-15 myń teńge aralyǵynda.