SQO-da kómir qymbattaǵan joq, tonnasy 17 500 teńgege deıin satylyp jatyr
PETROPAVL. QazAqparat – Soltústik Qazaqstan oblysynda bıýdjettik nysandar jylytý maýsymynda 144 myń tonna kómir jaǵady, qajetti otynnyń 94 myńy aýdandarǵa jetkizildi, dep habarlaıdy QazAqparat tilshisi.
SQO energetıka jáne turǵyn úı-kommýnaldyq sharýashylyǵy basqarmasynyń málimetinshe, aýdandardyń temirjol stansalarynda bıýdjettik nysandarǵa arnalǵan 94 myń tonna kómir jatyr. Bul barlyq qajettiliktiń 65 %-y.
Al oblys turǵyndary jylytý maýsymynda 391 myń tonna kómirdi paıdalanady. Osy ýaqytqa deıin halyq 258 myń tonna qara otyndy satyp alǵan.
«Turǵyndar qysqa qajet kómirdiń 66 %-yn satyp aldy. Bul - az. Jylytý maýsymyna ýaqytynda qamdanýy úshin turǵyndarmen túsindirý jumystaryn júrgizý qajet. Bıyl kómir qymbattaǵan joq, byltyrǵy baǵa tur, ıaǵnı tonnasy markasyna qaraı 8700 -17 500 teńge aralyǵynda», - deıdi SQO energetıka jáne turǵyn úı-kommýnaldyq sharýashylyǵy basqarmasynyń mindetin atqarýshy Baqyt Іlııasov.
SQO-da 491 qazandyq bolsa, sonyń 395-i jylytý maýysymyna daıyn.
Baqyt Іlııasovtyń aıtýynsha, Aıyrtaý aýdany Saýmalkólde «Aýyl – El besigi» jobasy aıasynda qýaty 14,5 MVt jetetin jańa qazandyq salynyp jatyr. Sondaı-aq uzyndyǵy 3,9 km jylý jelisi tartylady. Bul maqsatqa 724,6 mln teńge bólingen.
Bıyl Ǵ.Músirepov aýdanynyń ortalyǵy Novoıshımkada jańa ortalyq qazandyqtyń qurylysy bastalady. Nátıjesinde 1,5 myńǵa jýyq páteri bar 29 kópqabatty úıdi jylýǵa qosýǵa múmkindik týmaq.
Aqjar aýdany Talshyq pen Aıyrtaý aýdany Aryqbalyq eldi mekenderinde de bıyl jańa qazandyqtar iske qosylady. Mamlıýtka qalasynda «Aımaqtardy damytý 2020» baǵdarlamasy aıasynda 2019 jyly 1,6 km jylý jelisi salyndy. Sońǵy eki jylda ony iske qosýǵa oblys bıýdjetinen 44 mln teńge jumsaldy.
