SQO-da kómir baǵasyn qoldan kóterý faktileri anyqtaldy

PETROPAVL. QazAqparat – Oblysta eldi mekenderge kómir jetkizýshilerdiń keıbiri qyzmet qunyn negizsiz ósirip jibergen. Osyǵan baılanysty kómirdi jaqyn mańdaǵy eldi mekenderge tasymaldaýmen aınalysatyn júk kólikteriniń tizimi jasaldy, dep habarlaıdy QazAqparat tilshisi.

«Kómir tasymaldaýshylardyń arasynda baǵany ósirgender anyqtaldy. Máselen, Qyzyljar aýdanyna kezeksiz kómirdi jetkizýge 20 myń teńge alady. Osy oraıda, Qyzyljar, Esil aýdandaryna tasymaldaıtyn avtokólikterdiń tizimin jasadyq jáne 10-15 myń teńge aralyǵynda bir baǵany bekittik. Qazir tuıyqtarda ákimdik bergen tizimdegi kólikterge ǵana kómir tıelip jatyr», - dedi SQO ákiminiń orynbasary Sátjan Ablalıev.

Oblys ákimdiginiń málimeti boıynsha, óńirdiń kómirge qajettiligi – 419 myń tonna. Búgingi kúni onyń 192 myń tonnasy ákelindi. Ótken jyldyń osy merzimimen salystyrǵanda bıyl otyn kólemi 11%-ǵa artyq daıyndalǵan. Alaıda, kómirdiń bir bóligi shekara asyp jatqany belgili boldy.

«Shekara qyzmetimen jáne aýmaǵynda shekara beketi bar aýdan ákimderimen birge bul másele qaraldy. Shekara qyzmetiniń málimetinshe, «Jańajol» avtomobıl ótkizý pýnkti arqyly tamyz-qyrkúıek aılarynda kómirdi shekaradan ótkizýdiń 150 deregi tirkelgen. Bul – 3 100 tonna. «Bıdaıyq» arqyly 93 fakti anyqtaldy. 1 700 tonna kómir shekaradan ótken. Osylaısha, keıingi eki aıda 5 myń tonnaǵa jýyq kómir kórshi elge shyǵarylǵan. Biz kómirdi shekaradan asyrýǵa tyıym salamyz. Muny ákimder baqylaýda ustaýy tıis», - deıdi SQO ákimi Qumar Aqsaqalov.