SQO-da kombınatqa basyp kirip, jumysshylardy pyshaqtaǵan jeteý sottaldy
PETROPAVL. QazAqparat – Soltústik Qazaqstan oblysy Taıynsha aýdanyndaǵy «Obýhovskıı ken-baıytý kombınaty» JShS aýmaǵynda byltyr bolǵan tóbeleske qatysty úkim shyqty, dep habarlaıdy QazAqparat tilshisi.
Esterińizge salaıyq, byltyr maýsym aıynda Taıynsha aýdanyndaǵy «Obýhovskıı ken-baıytý kombınaty» JShS aýmaǵyna 30 shaqty adam kelip, basyp kirmek bolady.
Kásiporyn qyzmetkerleri olarǵa toıtarys berip, saldarynan 10 adam túrli jaraqat aldy.
Taıynsha aýdandyq № 2 soty qylmystyq isti qarap, ozbyrlyq kórsetken jeti adamǵa qatysty úkim shyǵardy.
Taıynsha aýdandyq № 2 sotynyń málimetinshe, sottalýshy K.V. Saverskıı «Tıolaın» JShS dırektorynyń orynbasary bolyp taǵaıyndalǵan.
Biraq ony kásiporyn aýmaǵyna kirgizbegendikten, quryltaıshylardyń bir bóligi óz jáne JShS atynan sotqa shaǵymdanǵan.
Sot JShS quryltaıshysy V.I. Dolgalevtiń, JShS burynǵy dırektory T.E.Almasbaevtyń, «Stal KZ» JShS kúzet kásipornynyń jáne «Obýhov ken-baıytý kásiporny» JShS Saverskııdi kásiporyn aýmaǵyna kirgizbeýin zańsyz dep tabady.
Alaıda, Saverskıı sot úkiminiń zańdy kúshine enýin kútpeı, ózi jaldaǵan kúzet agenttiginiń qyzmetkerleri M.J. Keńesbaı, E.K.Maıdanov, S.T. Medeýbaev, A.G. Bahtybaev, D.K. Japparov jáne K.N. Sekenovpen ken-baıytý kombınatynyń aýmaǵyna zańsyz túrde kúsh qoldaný arqyly kirmek bolǵan.
Olardyń kinási zardap shegýshilerdiń, kýágerlerdiń túsiniktemesimen jáne saraptama qorytyndysymen tolyq dáleldendi.
Keńesbaı, Maıdanov, Medeýbaev, Bahtybaev jáne Japparov óz kinásin moıyndady.
Sot úkim shyǵarý barysynda olardyń buryn sottalmaǵanyn esepke alyp, árqaısysyn 1 jyl 6 aıǵa bas bostandyǵynan aıyrdy.
Qylmysty uıymdastyrǵan Saverskıı 2 jylǵa sottaldy. Ol jazasyn qylmystyq-atqarý júıesiniń qaýipsizdik deńgeıi tómen mekemesinde ótkeredi.
Al tóbeles barysynda pyshaq qoldanyp, kásiporyn qyzmetkerleriniń birin jeńil jaralaǵan Sekenov 1 jyl 6 aıdy kolonııada ótkizedi.
Sondaı-aq sottalǵandar moraldyq zııan keltirgeni úshin zardap shekkenderge ótemaqy tóledi.
