SQO-da kolonııaǵa uıaly telefon ótkizgen advokat lıtsenzııasynan aıyryldy

PETROPAVL. QazAqparat – Soltústik Qazaqstan oblysynda qylmystyq-atqarý júıesiniń №66 mekemecinde jazasyn óteýshige uıaly telefon ákelip bergen advokat lıtsenzııasynan aıyrylyp, aıyppul tóledi, dep habarlaıdy QazAqparat tilshisi.

SQO prokýratýrasynyń málimetinshe, oqıǵa byltyr shilde aıynda bolǵan. Sottalǵan adamnyń advokaty R.Aıtov onymen kezdesýge kelip, áńgimelesý kezinde uıaly telefondy berý múmkindigin talqylaǵan.

2022 jyldyń 2 tamyzynda advokat zań kómegin kórsetemin degen syltaýmen taǵy da jazasyn óteýshige kelip, oǵan uıaly telefondy tapsyrdy.

Sottyń 2022 jylǵy 30 qyrkúıektegi qaýlysymen ákimshilik quqyq buzýshylyq týraly Kodekstiń 1-bóliginiń 481-baby boıynsha R.Aıtovtyń uıaly telefony tárkilenip, 30 630 teńge mólsherinde aıyppul túrindegi ákimshilik jazaǵa tartyldy.

R.Aıtov qylmystyq-atqarý júıesi mekemesinde jazasyn ótep jatqan adamǵa osyndaı mekemelerde saqtaýǵa jáne paıdalanýǵa tyıym salynǵan zatty jasyryp ótkizip, bermek boldy.

Oblys prokýratýrasy R.Aıtovty advokattyq qyzmetpen aınalysý quqyǵyn beretin lıtsenzııadan aıyrý týraly bastama kóterip, SQO Ádilet departamenti sotqa talap aryz berdi.

2023 jyldyń 10 naýryzynda sot sheshimimen SQO Ádilet departamentiniń R. Aıtovty lıtsenzııadan aıyrý týraly talaby qanaǵattandyryldy.

Al 21 shildede Ádilet vıtse-mınıstriniń buıryǵymen R.Aıtovqa QR ÁM bergen advokattyq qyzmetpen aınalysý quqyǵyna ıe memlekettik lıtsenzııanyń qoldanylýy toqtatyldy.