SQO-da qolónershiler qaýymdastyǵy qurylmaq
Jergilikti qolónershiler Elena Andreeva men Nanar Djanýntstyń aıtýynsha, SQO-da qolónershilik damyp keledi. Tiginshiler de, aǵash sheberler de, temir ustalary da bar. Alaıda óz ónimderin satatyn arnaıy oryn joq. Osy máselemen olar kásipkerler palatasyna keldi.
«2021 jyly biz Petropavldaǵy júrginshiler ǵana júretin Konstıtýtsııa kóshesinde, arbatta qoldan jasaǵan buıymdarymyzdy satýǵa, jergilikti ónerpazdardyń basyn qosýǵa ruqsat suradyq. Sol joly bizge ruqsat berip, S.Muqanov atyndaǵy oblystyq kitaphananyń jáne ólketaný mýzeıiniń aldyn bóldi. Tek jaımalarymyz qala sánin buzbaıtyndaı birkelki bolsyn dedi. Biz talapty oryndap, 2017 jylǵa deıin shyǵyp júrdik. Sodan keıin ruqsat joq dep aıyppul salatyn boldy», - deıdi Elena Andreeva.
Keıin eki jylǵa sozylǵan pandemııa da kedergi keltirgen. Búginde qolónershiler júrginshiler kóshesinde qoldan jasaǵan buıymdaryn jasaýǵa ruqsat aldy. Alaıda, máseleni sheshý úshin birneshe mekemeniń tabaldyryǵyn tozdyrýǵa týra kelgen. Jergilikti ákimdik sheberlerge byltyr ashylǵan QÚZÚLJAR art center ortalyǵynda saýda jasaýdy usynǵan.
«Ortalyqta buıymdardy satýǵa jaǵdaı jasalǵan, biraq oryndardy jalǵa alý kerek. Ári ol jer tasada, halyq kóp júrmeıdi. Sondyqtan biz bul másele jylda qaıtalanbaı birjola sheshilgenin qalaımyz», - deıdi Elena Andreeva.
SQO kásipkerler palatasynyń mamandary almatylyqtardyń tájirıbesimen tanyspaq.
«Onda statsıonarlyq emes saýda nysandary jaýapty memlekettik organnyń arnaıy qaýlysymen tirkelgen. Áleýmettik kásipkerlik korporatsııasy arqyly jer ýchaskelerin belgili bir merzimge jalǵa ala otyryp, osy obektilerdi paıdalanýǵa arnalǵan tender oınatylady. Almatyda úlken arbat bar, oǵan jergilikti qolónershiler, mýzykanttar, sýretshiler jáne basqalar zańdy negizde shyǵa alady. Kásipkerler palatasy retinde biz olardyń tájirıbesin zerdelep, ónimderińizdi arbatta satýǵa ruqsat berýdiń quqyqtyq negizin ázirleıik, ony bizdiń bılikke usynamyz», - dedi SQO Kásipkerler palatasynyń dırektory Álibek Áshmetov.
Sondaı-aq, qolónershiler bolashaqta keı máselelerdi sheshýde aýyzbirlik tanytý úshin qaýymdastyqqa birikpekshi.