SQO-da kolledjder Worldskills formatynda maman daıarlamaq
PETROPAVL. QazAqparat – Soltústik Qazaqstan oblysyndaǵy tórt kolledj «Jas maman» jobasy aıasynda zamanaýı jaraqtandyrylyp jatyr, dep habarlaıdy QazAqparat tilshisi.
Búgin SQO ákimi Qumar Aqsaqalov «Jas maman» baǵdarlamasyna qatysyp jatqan tórt kolledjdi aralady. Halyqaralyq standarttar engizilip jatqan oqý oryndarynyń materıaldyq-tehnıkalyq bazasyn jańartýǵa el qazynasynan 1,2 mlrd teńge bólingen.
SQO ákimi baspasóz qyzmetiniń málimetinshe, óńir basshysy aldymen M.Jumabaev atyndaǵy joǵary kolledjge bardy. Bilim ordasyna búginde 3D-modeldeý, zamanaýı mýltımedııalyq jáne robototehnıka kabınetterine qajet kerek-jaraq jetkizilgen. Buryn kolledjde munyń biri de bolmaǵan.
«Jas maman» baǵdarlamasyna qatysyp jatqan taǵy bir oqý orny – Soltústik Qazaqstan kásibı-pedagogıkalyq kolledji. Bilim ordasy Worldskills standarttaryna sáıkes jaraqtandyrylǵan. Mundaǵy «Elektrqondyrǵy» kabınetine qajetti qondyrǵylar alynyp, jańadan avtokólikke dıagnostıka jasaıtyn jáne jóndeıtin tseh ashyldy.
«Kolledjdegi tehnıka 30 jyldan astam jańalanbaǵan. Kúni keshe mundaǵy stýdentter qazir tipti shyǵarylmaıtyn eski Jıgýlı men Gaz-53 mashınasymen bilim alatyn. Saldarynan naryq suranysyna jaýap bere almaıtyn. Kolledjge jeńil avtokólikter men júk mashınasyn aldyq. Stýdentter kompıýterlik dıagnostıka jasaıtyn bolady. Bul – qymbat qondyrǵy. Qaladaǵy tehnıkalyq qyzmet kórsetý stansalarynda ondaı jabdyq joq», - deıdi Qumar Aqsaqalov.
Petropavl qurylys-ekonomıkalyq kolledjinde qurylys materıaldaryna saraptama jasaıtyn zerthana ashyldy. Júk kótergish mashına alyndy. Tehnık-tehnolog mamandaryn daıarlaýǵa qajet materıaldy-tehnıkalyq baza jańartyldy.
Jańǵyrtý jumystary mashınajasaý kolledjinde de júrgizilmek. Kásibı sheberligi joǵary mamandardy ázirlep shyǵarý úshin sandyq esepteý júrgizetin bildekter alynbaq.
Oblys ákimi Qumar Aqsaqalovtyń aıtýynsha, «Jas maman» baǵdarlamasy kelesi jyly jalǵasyn tabady. Óńirdegi bes kolledjdi qamtyp, materıaldyq-tehnıkalyq bazasyn jaqsartýǵa 1,5 mlrd teńge jumsalmaqshy.
