SQO-da kólikti mas kúıde basqarǵan 13 júrgizýshi ustaldy
PETROPAVL. QazAqparat – Soltústik Qazaqstan oblysynda 8 kúnniń ishinde kólikti mas kúıde basqarǵan 13 júrgizýshi ustaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 8 kúnniń ishinde oblys joldarynda mas kúıdegi 13 júrgizýshi anyqtaldy, onyń 6-y – Petropavl qalasy aýmaǵynda ustalǵan.
Tájirıbe kórsetkendeı, kólikti mas kúıde basqarýdyń arty kóp jaǵdaıda qaıǵyly aıaqtalyp jatady. Óreskel quqyq buzýshylyqtyń aldyn alý maqsatynda tártip saqshylary únemi profılaktıkalyq is-sharalar ótkizip turady.
6 jeltoqsanda Aıyrtaý aýdanynyń ortalyǵy Saýmalkólde «Mitsubishi Outlander» avtokóligi janar-jaǵarmaı quıý beketine toqtamaq bolyp, burylysta rólge ıe bola almaı joldan ushyp ketken. Bul jaıynda polıtsııaǵa kýágerler habarlap, oqıǵa ornyna batalon qyzmetkerleri keldi. Júrgizýshi zardap shekpegen, odan alkogoldiń ıisi shyǵyp turǵan. Medıtsınalyq kýálandyrý er adamnyń mas ekendigin kórsetti.
Al Ǵ.Músirepov atyndaǵy aýdanda polıtseıler kólikti toqtatqan. Onyń 47 jastaǵy júrgizýshisiniń kólik quralyn basqarý quqyǵy joǵy anyqtaldy. Onyń júrgizýshi kýáliginiń merzimi eki jyl buryn ótip ketken. Júrgizýshige ákimshilik hattama toltyrylyp, sot úkimimen 20 táýlikke ákimshilik qamaqqa alyndy.
«Kólik basqarý quqyǵynan aıyrylǵan 7 júrgizýshi ustaldy. Zańnama talaptaryn elemeı, mas kúıde kólik júrgizý tyıylmaı otyr. Jyl basynan SQO-da mas júrgizýshilerdiń kinásynen 25 jol-kólik oqıǵasy boldy. Saldarynan 6 adam qaza taýyp, 32 adam jaraqat aldy», - deıdi Jergilikti polıtsııa qyzmeti basqarmasynyń bastyǵy Aıdyn Baımatov.
