SQO-da kólikke júkti shamadan tys artqandarǵa 31 mln teńge aıyppul salyndy
PETROPAVL. QazAqparat – Soltústik Qazaqstan oblysynda jyl basynan júk kólikterine qatysty 413 ákimshilik is qozǵalyp, 31 mln teńgeniń aıyppuly salyndy, dep habarlaıdy «QazAqparat» HAA tilshisi.
SQO boıynsha kóliktik baqylaý ınspektsııasynyń basshysy Rýslan Seıtalınniń aıtýynsha, tek
tamyz aıynyń eki aptasynda ǵana júk kóligine shamadan tys júk artýǵa baılanysty
55 ákimshilik materıal toltyrylǵan.
10 tamyz kúni saǵat 18.00 shamasynda Beskól aýylynyń mańaıynda reıd
barysynda júk tasymaldaýshy tarazyǵa turýdan bas tartqan.
«Reseıde tirkelgen, 20 tonna qıyrshyq tas artylǵan MAZ kóligin tekserý
úshin ınspektsııa mamandary toqtatty. Alaıda onyń júrgizýshisi júk mashınasyn tastap, jeńil kólikke otyryp belgisiz baǵytqa ketip qalǵan. Bul
jaıynda SQO Polıtsııa departamentiniń kezekshi bólimine jedel habar berildi. Shamamen 1 saǵattan keıin MAZ kóliginiń júrgizýshisi qaıtyp kelip, artylǵan júktiń bir bóligin jolǵa jáne onyń shetine túsirip tastady. Kólik
júrgizýshisiniń jáne laýazymdy tulǵalardyń is-áreketteri qyzmettik beınejetonǵa tirkeldi», - deıdi basqarma basshysy.
SQO PD jergilikti polıtsııa qyzmeti basqarmasynyń patrýldik mashınasy
oqıǵa ornyna kelip, zańbuzýshyǵa qatysty «Laýazymdyq mindetterin oryndaýǵa kedergi keltirý», «Kabotaj», «Kólik quraldarynyń qozǵalysyna kedergi jasaý» baptary boıynsha birneshe ákimshilik materıal toltyrdy.
Jalpy aıyppuldyń mólsheri 143 myń teńgeden asty.
Rýslan Seıtalınniń sózine qaraǵanda, kóliktik baqylaý ınspektsııasy atalǵan derek
boıynsha quzyrly organdarǵa júktiń qaıdan alynǵanyn jáne tasymaldyń
zańdylyǵyn anyqtaý maqsatynda aqparat jiberdi.
Jalpy SQO-da mamandar jyl basynan 3 myńǵa jýyq júk kóligin teksergen.
Olardyń 413-iniń zań buzǵany anyqtalyp, ákimshilik is qozǵaldy. 31 mln teńgeniń aıyppuly salyndy.
