SQO-da kólikke soǵylǵan jylqynyń ıesi aıyppul tóleıdi
PETROPAVL. QazAqparat – Soltústik Qazaqstan oblysynda «Lexus RH350» kóligi jol ústine shyǵyp ketken jylqyǵa soǵylǵan. Endi maldyń ıesi aıyppul tólemek, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa keshki saǵat 19.00 shamasynda «Taıynsha-Kellerovka» avtojolynda Mnogotsvetnyı eldi mekeniniń mańynda bolǵan. «Lexus RH350» kóligimen kele jatqan Petropavldyń 31 jastaǵy turǵynynyń aldynan bir úıir jylqy atyp shyqqan. Júrgizýshi jaltaryp úlgermeı, jylqynyń birin qaǵyp ketken. Júrgizýshi de, jylqy da aman, alaıda kólikke aıtarlyqtaı zaqym keldi.
Kólik júrgizýshisi polıtsııaǵa habarlasyp, oqıǵa ornyna ýchaskelik polıtsııa ınspektory jetti. Ol birden úıir jylqynyń ıesin anyqtap, Taıynsha qalasynyń turǵyny 59 jastaǵy er adamǵa qatysty eki ákimshilik hattama toltyrdy.
«Bul bıylǵy osyndaı ekinshi jaǵdaı. Qaraýsyz júrgen mal jol-kólik oqıǵasyna sebepshi boldy. Eki jaǵdaıda da adamdar zardap shekpedi. Mal ıeleri tarapynan bul úlken jaýapsyzdyq. Olar urlyq jasaýǵa jaǵdaı jasap qana qoımaı, joldaǵylarǵa qater tóndirdi. Mundaı jaǵdaıdyń aldyn alý úshin ýchaskelik polıtsııa ınspektorlary únemi aldyn alý is-sharalaryn, kezdesý uıymdastyryp turady. Malyn bos qoıa bergender ákimshilik jaýapkershilikke tartylady», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
