SQO-da kólik júrgizýshisi oqýshyny qaǵyp, oqıǵa ornynan qashyp ketti
PETROPAVL. QazAqparat – Soltústik Qazaqstan oblysynda polıtseıler joldan ótip bara jatqan 10 jasar balany kóligimen qaǵyp ketip, oqıǵa ornynan qashyp ketken júrgizýshini ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa 7 sáýirde saǵat 14.00 shamasynda Qyzyljar aýdany Beskól aýylynyń mańynda bolǵan. «Jezqazǵan-Petropavl» avtojoly boıyndaǵy jaıaý júrginshiler ótkelinde qyzyl tústi «Mercedes-Benz» avtokóliginiń júrgizýshisi 10 jasar mektep oqýshysyn soǵyp ketip, oqıǵa ornynan jasyrynǵan.
Er balaǵa aýdandyq ortalyq aýrýhanada kómek kórsetildi. Medıtsına qyzmetkerleri oqıǵa jaıly birden polıtseılerge habarlady. Apatqa kinálini anyqtaý boıynsha sharalar qabyldanyp, ol beınebaqylaý kameralarynyń kómegimen anyqtaldy.
Kelesi kúni tártip saqshylary quqyq buzýshyny ustady. Ol 34 jastaǵy Aqqaıyń aýdanynyń turǵyny bolyp shyqty. Er adamǵa qatysty QR Ákimshilik quqyq buzýshylyq týraly kodekstiń «Júrgizýshiniń jol-kólik oqıǵasyna baılanysty mindetterdi oryndamaý» baby boıynsha hattama toltyryldy.
Júrgizýshiniń aıtýynsha, ol bolǵan jaǵdaıdan qorqyp, ne isterin bilmegen. Er adamnyń júrgizýshi kýáligi alyndy, kólik arnaıy turaqqa qoıyldy. Sonymen qatar, balanyń alǵan jaraqattarynyń aýyrlyǵyn anyqtaý úshin sot-medıtsınalyq saraptama taǵaıyndaldy. Saraptama nátıjeleri boıynsha protsessýaldyq sheshim qabyldanady.
«Esterińizge sala keteıik: apat bolǵan jaǵdaıda júrgizýshi ishki ister organdaryna habarlaýǵa mindetti. Ol zardap shekkenderge alǵashqy medıtsınalyq kómek kórsetý úshin barlyq sharalardy qabyldap, jedel járdem shaqyrýy tıis. Tótenshe jaǵdaıda jaraqat alǵandardy jolshybaı ketip bara jatqan kólikpen jiberý kerek, al eger bul múmkin bolmasa – óziniń kóligimen jaqyn jerdegi medıtsınalyq mekemege jetkizip, sodan soń oqıǵa ornyna oralýy tıis», - deıdi SQO PD Jergilikti polıtsııa qyzmeti basqarmasynyń izdeý tobynyń aǵa ınspektory Alekseı Morev.
