SQO-da kólik júrgizý quqyǵynan aıyrylǵan kelinshek taǵy da mas kúıde rólge otyrǵan
PETROPAVL. QazAqparat – Soltústik Qazaqstan oblysynda kólik júrgizý quqyǵynan aıyrylǵan kelinshek mas kúıde rólge otyryp, aýyl kósheleriniń birinde aýdarylyp qaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Aıyrtaý aýdandyq polıtsııa bólimine aýdan ortalyǵy Saýmalkólde «VAZ-21140» markali kóliktiń kóshelerdiń birinde aýdarylyp qalǵany jaıynda habarlama túsken.
Oqıǵa ornyna jetken tártip saqshylary kólikti 34 jastaǵy áıeldiń tizgindegenin anyqtady. Kelinshek zardap shekpegen, ol rólge mas kúıde otyrypty. Medıtsınalyq kýálandyrý júrgizýshiniń ishimdik ishkenin rastady.
«Avtoledı» buǵan deıin kólikti spırttik ishimdik iship júrgizgeni úshin kólik basqarý quqyǵynan aıyrylǵan eken. Byltyr taǵy da mas kúıde kólik tizgindep, ustalǵan. Ol joly aýdandyq sottyń úkimimen 2,5 jylǵa bostandyǵy shektelip, ómir boıyna kólik júrgizýge tyıym salynǵan edi. Bul da áıelge sabaq bolmapty.
Aıtýynsha, ol sol kúni tanystaryna barmaq bolyp shyqqan. Jolda kólikti basqara almaı qalyp, aýdaryp alǵan. Bul derek sotqa deıingi tergep-tekserýlerdiń biryńǵaı tizilimine engizildi, kólik arnaıy avtoturaqqa qoıyldy.
«Byltyr osy azamatshaǵa qatysty qozǵalǵan qylmystyq ispen jyldy japtyq. Endi osy áıeldiń isimen jyldy ashyp otyrmyz, bul – alǵashqy qylmystyq is. Kólikti mas kúıde júrgizý – qaýipti, kóp jaǵdaıda jol-kólik oqıǵasyna ákeledi. Al bul azamatsha sottyń úkimin, zań talabyn oryndamaǵan», - deıdi Aıyrtaý aýdandyq polıtsııa bóliminiń bastyǵy Marat Serkeshov.
