SQO-da kólik aıdaý quqyǵynan aıyrylǵan júrgizýshi mas kúıinde jol apatyna ushyrady
PETROPAVL. QazAqparat – Soltústik Qazaqstan oblysynda mas júrgizýshi jol-kólik apatyna ushyrady. Joldan shyǵyp ketken ol buǵan deıin kólik basqarý quqyǵynan aıyrylǵan eken, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 21 maýsymǵa qaraǵan túni shamamen saǵat 01.00-de Mamlıýt aýdany polıtsııa bóliminiń qyzmetkerleri patrýldeý barysynda Voskresenovka aýyly mańynda joldan shyǵyp ketken «Audi» avtokóligin anyqtaıdy.
Kóliktiń qasynda júrgizýshi, ıaǵnı Petropavldyń 33 jastaǵy turǵyny bolǵan. Odan spırttik ishimdiktiń ıisi shyǵyp turǵan.
Medıtsınalyq kýálandyrý onyń alkogoldi mas kúıde bolǵanyn kórsetti.
2019 jyly er adam avtokólikti mas kúıde basqarǵany úshin júrgizý quqyǵynan 3 jylǵa aıyrylǵan bolatyn. Alaıda, bul oǵan toqtaý salmapty.
Atalǵan fakti Sotqa deıingi tergep-tekserýdiń biryńǵaı tizilimine QR Qylmystyq kodeksiniń 346-baby boıynsha engizildi, bapta basqarý quqyǵynan aıyrylǵan tulǵalarǵa jáne rólge mas kúıde otyrǵandarǵa qatysty jaýapkershilik kózdelgen. Kólik arnaıy turaqqa qoıyldy.
«Jol-kólik oqıǵasynan kólik mehanıkalyq zaqymdandy. Júrgizýshisi aman. Mundaı jol-kólik oqıǵalarynyń saldary áldeqaıda aýyr aıaqtalyp jatady. Mas júrgizýshi óz ómirine ǵana emes, basqa barlyq jol qozǵalysy qatysýshylaryna qaýip tóndiredi. Basqarý quqyǵynan aıyrý týraly sot sheshimin elemeı, rólge qaıta mas kúıde otyratyn adamdarǵa qatań jaza bar. Olarǵa úlken mólsherde aıyppul salýdan bastap, ómir boıyna kólik júrgizý quqyǵynan jáne 5 jylǵa deıin bas bostandyǵynan aıyrýǵa deıin qatań jaza qoldanylady», - deıdi SQO polıtsııa departamenti jergilikti polıtsııa qyzmeti basqarmasynyń bastyǵy Aıdyn Baımatov.
Jyl basynan oblysta QR QK 346-baby boıynsha 34 fakti tirkeldi.
