SQO-da kólik aýdarylyp, bir adam qaza tapty, úsheýi aýyr jaraqattandy
PETROPAVL. QazAqparat – Soltústik Qazaqstan oblysynda jeńil kólik joldan shyǵyp ketip aýdarylyp, bir adam qaza tapty, taǵy úsheýi aýyr jaraqattandy, dep habarlaıdy QazAqparat tilshisi.
Oqys oqıǵa keshe Qyzyljar aýdany Novokamenka eldi mekeniniń mańynda bolǵan. Qatty kóktaıǵaqtan jeńil kólik joldyń shetine ushyp ketken. Apat jaıynda aqpar áleýmettik jelide tarady. Jeli qoldanýshylardyń aıtýynsha, qaza tapqan áıel bıologııa pániniń muǵalimi.
Jol-kólik oqıǵasy jaıynda Qyzyljar aýdandyq polıtsııa bólimi túsinik berdi.
«Jezqazǵan-Petropavl» avtojolynyń 935 shaqyrymynda saǵat 15.00 shamasynda Audi markali kóliktiń 1999 jyly týǵan júrgizýshisi rýlge ıe bola almaı, kólik aýdarylǵan. Saldarynan úsh jolaýshy jaraqat alyp, emdeý mekemesine jetkizildi. Taǵy bir jolaýshy oqıǵa ornynda kóz jumdy.
Bul fakti Sotqa deıingi tergep-tekserýlerdiń biryńǵaı tizilimine engizildi. Tártip saqshylary oqıǵanyń mán-jaıyn anyqtaıtyn bolady, tıisti birqatar saraptama taǵaıyndaldy. Atqarylǵan is-sharalardyń qorytyndysy boıynsha protsessýaldyq sheshim qabyldanady», - delingen habarlamada.
SQO-da 30 qazan keshqurym qar aralas jańbyr jaýyp, aýa temperatýrasy -5 gradýsqa deıin tómendedi. Jeksenbide óńirde qatty kóktaıǵaq boldy. Qazir oblysta aýa temperatýrasy +1 gradýsty kórsetkenimen, túnde -12 gradýsqa deıin sýytady degen boljam bar.
