SQO-da «kóleńkeli» ekonomıkadan mlrd teńge shyǵyn kelgen

PETROPAVL. KAZINFORM – Soltústik Qazaqstan oblysynda bıyl tabysty jasyrýdyń 40 deregi anyqtaldy.

SQO ekonomıkalyq tergeý departamenti basshysynyń orynbasary Samat Sharıshevtiń aıtýynsha, «kóleńkeli» ekonomıkadan kelgen shyǵyn mlrd teńge shamasynda, onyń 700 mln-y ótelgen.

- Salyq tólemeý úshin kiristi kórsetpeý nemese azaıtýdyń zardaby aýyr. Bul bıýdjetke túsetin salyqtyń tómendeýine ákeledi, saldarynan áleýmettik baǵdarlamalar men ınfraqurylymdy qarjylandyrýǵa keri áserin tıgizedi. Jalpy bıyl salyq tóleýden jaltarýdyń 3 faktisi anyqtaldy, onyń ekeýi boıynsha shamamen 500 mln teńge óndirilip alyndy, - deıdi Samat Sharıshev.

Sondaı-aq zańsyz kásipkerlikpen aınalysýdyń 4 faktisi boıynsha sotqa deıingi tergeý júrgizildi. Bul negizinen aktsızdeletin ónimniń zańsyz aınalymyna baılanysty qylmystyq ister.

Óńirde bir jyl ishinde 136 myńnan astam qorap temeki ónimderi men myń lıtrden astam sýrrogat alkogol ónimi tárkilenip, joıyldy.

- Tsıfrlyq tehnologııalardyń damýy jáne krıptovalıýtany paıdalaný quqyq buzýshylardyń da nazarynan tys qalmaı, olar ony óz múddesine qoldana bastaǵan. Jeke tulǵalardyń tsıfrlyq aktıvter aınalymy boıynsha zańsyz kásipkerlik qyzmeti anyqtalyp, úkim shyǵaryldy. Nátıjesinde memleket esebine shamamen 400 mln teńgeniń múlki men krıptoaktıvter tárkilendi, - deıdi departament ókili.

Mamannyń aıtýynsha, qarjy pıramıdalarymen kúres te turaqty júrgizilip keledi. Jylda qylmystyń osy túrine qatysty birneshe derek anyqtalady.

Bıyl qarjy pıramıdasyna qatysty úsh qylmystyq is tirkelip, ekeýi sotqa jiberildi.