SQO-da kóldegi muz ústinde qalǵan 5 balyqshy qutqaryldy
PETROPAVL. QazAqparat – Soltústik Qazaqstan oblysyndaǵy Úlken Torańǵul kólinen muz ústinde qalǵan bes balyqshy qutaryldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa 12 sáýir kúni tús shamasynda bolǵan. Úlken Torańǵul kóliniń mańyndaǵy qutqarý beketine kómek suraǵan balyqshylar habarlasady. Sý qoımasynyń janynda kúndelikti kezekshilik atqaratyn qutqarýshy Vıacheslav ıAkovlev muzdyń betinde jaǵadan alystap bara jatqan bes balyqshyny kóredi.
«T-40» traktorymen motorly qaıyqty sýǵa túsirdim. Balyqshylar jaǵadan 300 metrdeı qashyqtyqqa ketip qalypty. Muzdarǵa soǵylmaý úshin abaılap otyryp jettim. Olardyń qýanyshynda shek bolmady. Aıtýlarynsha, eskertý belgilerin de, muzdyń jarylǵanyn da kórgen. Alaıda, ústine shyǵyp, balyq aýlaǵan. Qyzyǵyna batqandary sondaı, muzdyń jaǵadan ketip qalǵanyn baıqamaı qalypty», - deıdi qutqarýshy Vıacheslav ıAkovlev.
Muzdyń ústinen balyqshylardyń árqaısysyn bir-birlep shyǵarýǵa týra kelgen. Qutqarý operatsııasy 1,5 saǵatqa sozyldy.
Balyqshylar Úlken Torańǵul kóliniń mańyndaǵy Korneevka eldi mekeniniń turǵyndary eken. Qutqarylǵan 55 pen 72 jas aralyǵyndaǵy er adamdar 20 jyldyq eńbek ótili bar qutqarýshyǵa alǵystaryn jaýdyrdy.
«Úlken Torańǵul - balyqshylardyń súıikti kóli. Kópshilik eskertýge qulaq aspaı jatady. Muzdyń ústine avtokólikpen shyǵyp ketetinderi de bar. Óz ómirlerin qaýipke tigedi. Ásirese, qazirgideı kóktem ýaqytynda, betindegi muz jarylyp, erip jatqanda ózen-kólderge baryp balyq aýlaý qaýipti», - deıdi qutqarýshy.
