SQO-da kólde qaıyǵyn jel aıdap ketken balyqshy qarııa qutqaryldy

PETROPAVL. QazAqparat – Soltústik Qazaqstan oblysyndaǵy Beskól aýylynyń 70 jastaǵy turǵyny balyq aýlaýǵa shyǵyp, qatty jeldiń saldarynan qaıyǵymen aýyldan alystap ketken. Er adamdy aýyldan qashyq jerden, qalyń qamys arasynan polıtseıler men qutqarýshylar aman-esen tapty, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Qyzyljar aýdany Beskól aýylynyń 70 jastaǵy turǵyny Sergeı Kosenko týystaryn eskertpeı, tańerteń kólge ketip qalǵan. Tek keshke jaqyn zeınetker balalaryna telefon arqyly habarlasqan. Er adam qaıyqpen kóldiń ortasyna ketip qalyp, baǵytynan adasyp ketkenin aıtqan. Sondaı-aq nemeresine kóldiń Aqqaıyń aýdany Daıyndyq aýylyna jaqyn jerde ekenin aıtyp úlgergen, keıin telefonynyń qýaty taýsylyp, baılanys úzilip ketken.

Sol kúni bastalǵan jańbyr men qatty jel týystaryn ábigerge salǵan. Ózdiginen qarııany taba almaıtynyna kóz jetkizgen balyqshynyń nemereleri «112» arnasyna habarlasyp, kómek suraǵan.

Aqqaıyń aýdanynyń ýchaskelik polıtsııa ınspektory men TJD qyzmetkerleri balyq aýlaýǵa shyǵyp, adasyp ketken er adamdy izdep tabýǵa járdemdesti.

Іzdeý toby qyzmettik avtokóligimen kól jaǵasyn aralap, balyqshynyń ústinen túsedi.

5 saǵat boıy jaǵaǵa shyǵa almaı adasqan zeınetker qamys arasynan kóringen jaryqty baıqap, jaǵalaýǵa qaraı bet aldy. Qatty tońǵan er adamdy jaǵalaýda týystary kútip aldy.

«Qıyn jaǵdaıǵa tap bolǵanda ne isterińdi bilmeısiń, abdyrap qalasyń, boıyńdy qorqynysh bıleıdi. Polıtsııa, tótenshe jaǵdaı departamentinde naǵyz myqty, batyl, óz isine jaýapty, qoldaý kórsetetin qyzmetkerler jumys isteıdi. Atamyzdy aman-esen taýyp bergen olarǵa alǵysym sheksiz», - deıdi Beskól kentiniń turǵyny Natalıa Salmına.